Bylykbashi: Kush i hap problem Ramës, përballet me vetingun
Nënkryetari i Komisionit të Ligjeve, Oerd Bylykbashi, ka ngritur shqetësimin se pas shkarkimit të gjyqtarëve të Gjykatës Kushtetuese dhe rrënimit të Gjykatës së Lartë, është mbyllur de facto edhe Gjykata dhe Prokuroria e Krimeve të Rënda. Në një reagim për mediat, Bylykbashi ka akuzuar Kryeministrin Rama se përmes presionit të vetingut, po penalizon të gjitha organet gjyqësore, duke i lënë ato jashtë funksioni. “Pas mbylljes së Gjykatës Kushtetuese, rrënimit të Gjykatës së Lartë, de facto u mbyll edhe Gjykata dhe Prokuroria e Krimeve të Rënda. Falë Edi Ramës, reformator. Kush guxon e kundërshton apo i hap probleme Kryeministrit, shpejt do të përballet me vetingun”, shprehet Bylykbashi. Nënkryetari i Grupit Parlamentar të PD- së sjell në vëmendje se si është lënë pa kompetenca deri në ngritjen e SPAK, Gjykata dhe Prokuroria e Krimeve të Rënda. “Kur plasën përgjimet e Habilajve që implikonin Tahirin, e pasi Prokuroria e Krimeve të Rënda kërkoi arrestimin e tij, në fillim Edi Rama sulmoi prokurorët e Krimeve të Rënda si ‘ veriorë’. Më pas, Edi Ramaý urdhëroi deputetët e tij të kthenin ýParlamentin në gjykatë e të refuzonin kërkesën e Prokurorisë së Krimeve të Rënda për arrestim të Tahirajt. Më pas, Edi Rama urdhëroi ekstradimin e Seitajt, ýdëshmitarit kyç kundër Tahirit, që ta linte Prokurorinë e Krimeve të Rënda me duar bosh. Më pas, Gjykata e Lartë, në grahmat e fundit para se të mbyllë kanatat përpara presionit të Kryeministrit, si Gjykata Kushtetuese, me një vendim vendosi që Krimet e Rënda, në të cilat nuk ka grup të strukturuar kriminal, t’i kalojnë prokurorive dhe gjykatave të rretheve që kontrollon drejtpërdrejt Prokurorja Provizore. Me këtë akt, Krimet e Rënda kanë mbetur pa punë. Një investim gjigant me miliona euro, që ka çuar pas hekurave qindra kriminelë, sot është hedhur në plehra. Pasoja: 613 kg kokainë të Maminasit transferohen nga Krimet e Rënda në Prokurorinë e Durrësit. Fundja, ç’grup i strukturuar kriminal ishte ai?! Një shofer, një punonjës dhe administrator i kishin sjellë 613 kg kokainë. Në fund, Krimet e Rënda do të zëvendësohen nga SPAK, me kësmet kur ky i fundit të ngrihet. Deri atëherë kanë ngelur duarbosh. Si një luan pa dhembë”, deklaron Bylykbashi.