Mblidhet Senati Akademik i UT, miratojnë pagat e tyre
“20 mijë lekë për çdo mbledhje. Vendimi final në dorë të bordit”
Me marrjen në dorë të financave të universitetit, siç parashikon ligji i ri i arsimit, tashmë është bërë e udhës që si bordi, ashtu edhe senati, të vetëcaktojnë pagesën që duhet të marrin për pjesëmarrjen në mbledhje. Në të dytën mbledhje për këtë vit akademik, janë marrë disa vendime me rëndësi. Në rend dite kanë qenë shqyrtimi i planit buxhetor për vitin 2018, caktimi i grupit të punës për realizimin e manualit të performancës dhe aftësive të universitetit, hartimi i strukturës së përgjithshme të Universitetit të Tiranës, vendosja e emrit “Sabiha Kasimati” Muzeut të Shkencave të Natyrës, si dhe një pikë e lirë, që zakonisht emërtohet “të ndryshme”. Ndonëse nuk ka qenë e shkruar në njoftimin për mbledhjen e zhvilluar përpara disa ditësh, anëtarët e senatit kanë pasur gati propozimin që ia bënin vetes për t’i miratuar pagesën për shërbimin që ata kryejnë. Këtë, ata e bazojnë në ligjin për arsimin e lartë dhe vendimin e qeverisë nr. 329, datë 12.04.2017 “Për statusin dhe trajtimin e veçantë të personelit akademik”. Gjithsesi, vendimi final mbetet në dorë të organit më të lartë administrues të universitetit, Bordit. “Senati Akademik i UT- së, në mbledhjen e datës 26.03.2018, vendosi të miratojë paraprakisht pagesën për pjesëmarrjen dhe kontributin e tyre në Senatin Akademik të UT- së në masën 20.000 lekë për çdo mbledhje. Ky vendim i përcillet për miratim përfundimtar Bordit të Adminis- trimit të UT- së”, thuhet në vendimin nr. 9 të Senatit Akademik. Mbetet për t’u parë nëse bordi do t’i japë OK vendimit që mban firmën e rektorit Mynyr Koni, pas përplasjeve të ndodhura midis tyre. Sakaq, ky i fundit ka shpallur në faqen zyrtare të universitetit, konkurrimin për përzgjedhjen e tre pedagogëve në “pikën më të nxehtë të debatit”, Fakultetin Ekonomik. Shpallja me kriteret dhe aplikimin deri në datën 9 prill është bërë përmes Agjencisë së Prokurimit Publik, ashtu siç edhe pretendonte rektori. Një pikë tjetër shumë e debatuar është buxheti, i cili është miratuar parimisht nga rektori dhe Senati Akademik. Në dokument detajohen kuotat e buxhetit të konsoliduar, shpenzimet operative dhe investimet me burim nga të ardhurat, si dhe numrin e planifikuar të punonjësve. Gjithashtu, Muzeu i Shkencave të Natyrës nga sot do të mbajë emrin e një prej themelueses dhe shkencëtares, Sabiha Kasimati.