Nisma për gjelbërimin e Tiranës, Majko mbjell 100 pemët e diasporës
Nismës për gjelbërimin e Tiranës i është bashkuar edhe ministri i Shtetit për Diasporën, Pandeli Majko. Së bashku me kryebashkiakun Erion Veliaj, ai zgjodhi të mbillte 100 fidanë të rinj në njësinë që e ka votuar. Majko u shpreh entuziast për ndryshimin që ka pësuar kjo njësi nën drejtimin e Veliaj dhe mbi të gjitha, për kulturën e re që po përqafojnë njerëzit. Në fillim të viteve ’ 90, njerëzit i prisnin pemët rrugëve edhe për revoltë ndaj të ashtuquajturit rregull, ishte diçka shumë dëshpëruese. Por, është interesante që njerëzit po kthehen në një kulturë tjetër, jo të prerjes së pemëve, por të mbjelljes së pemëve. Mendoj se nisma është e jashtëzakonshme, pavarësisht se ka pasur, si zakonisht, cinikë në fillim”. Duke renditur disa nga punët e bëra për Njësinë nr. 5, kryetari Veliaj tha se kjo njësi është transformuar tërësisht. Sipas tij, kjo është mënyra më e mirë për të nisur pranverën. “Mbaj mend sfidat e fillimit: s’kishte mbaruar rruga e ‘ Kosovarëve’, sa kishte filluar Parku Olimpik, infrastruktura qoftë edhe këtu në lagjen “Shushica” apo te stadiumi ‘ Dinamo’ linte për të dëshiruar. Sot jemi në një fazë krejt tjetër. Teksa po mbaron rrethrrotullimi i ‘ Komunës së Parisit’, që stabilizon trafikun për gjithë njësinë, jemi duke shtuar pemët dhe gjelbërimin në të gjitha lulishtet e njësisë”. Nismës së Bashkisë së Tiranës për të shtuar gjelbërimin i janë bashkuar edhe qindra bashkatdhetarë nga diaspora. Që javën e kaluar, bashkia arriti rekordin e synuar për mbjelljen e më shumë se 100 mijë pemëve në vetëm pak muaj, ndërsa për shkak të interesit të shumë biznesmenëve, kjo fushatë është shtyrë deri më 22 prill.