Mësuesi i matematikës, skandal me video perverse
Pasi rasti u publikua nga Berisha, Policia shoqëron Fatmir Dervinën: Nuk jam unë, e montuan për të më prishur imazhin
Mësuesi i matematikës në Fushë- Krujë i dërgon video në momente intime nxënëses së tij. Bëhet fjalë për mësuesin Fatmir Dervina në shkollën “Adem Gjeli”.
Një video, imazhet e së cilës pretendohet se i përkasin atij, është shpërndarë fillimisht në rrethet e ngushta në Fushë- Krujë dhe më pas ajo u publikua nga ish- Kryeministri Berisha. “Me turp, por sot në shkollën 9- vjeçare “Adem Gjeli” në Fushë- Krujë, në telefonat e nxënësve qarkullonte një video perverse e mësuesit të matematikës. Duke mos mjaftuar kjo, nxënësit dhe mësuesit janë përballur me presionin e drejtoreshës Nikolina Karaj, e cila e kaloi në heshtje, si dhe shumë ngjarje të tjera të ndodhura në këtë shkollë”, thuhej në statusin e Berishës, i cili i referohet qytetarit dixhital. Disa orë pas denoncimit të ish- Kryeministrit Berisha, në lidhje me videon perverse të mësuesit, Policia dhe Prokuroria e Krujës nisën hetimet. Mësohet se Fatmir Dervina është shoqëruar në Policinë e Krujës dhe është marrë në pyetje në lidhje me videon perverse që qarkullon në rrjetet sociale.
“Po punojnë specialistët për Krimet në Krujë në bashkëpunim me Prokurorinë e Rrethit. Aktualisht, mësuesi ndodhet në komisariat dhe po pyetet për videon perverse. Ai nuk ka pranuar të ketë bërë ndonjë akt të tillë, duke pretenduar se është video e sajuar për t’i prishur imazhin”, sqaruan burime për “Panorama” nga grupi i hetimit, i ngritur për të hetuar këtë ngjarje të rëndë. Mësuesi ka këmbën- gulur se kjo video është sajuar, pasi nuk është ai personi i paraqitur në pamjet e publikuara.
“Nuk kam asnjë lidhje me këtë video. Jam një mësues në karrierë dhe shumë i respektuar në sektorin arsimor, në marrëdhëniet shoqërore, familjare, por edhe në lidhje me nxënësit. Absolutisht e konsideroj tendencioze, me qëllim prishjen e imazhit tim. Kjo është një video e sajuar për të prishur reputacionin tim. Unë jam një njeri familjar dhe s’kam lidhje me këto akuza dhe baltën që po hidhet mbi personalitetin tim”. Kështu është shprehur mësuesi i matematikës, gjatë marrjes në pyetje në Polici. Ai ka këmbëngulur gjatë të gjithë kohës se gjithçka është e montuar. Nga ana tjetër, në rrjete sociale pretendohet se mësuesi është vetëfilmuar në momente perverse dhe ia ka dërguar atë një prej nxënëseve të tij. Më pas, videoja është shpërndarë, duke u bërë virale ditën e djeshme në rrjetet sociale. Tashmë, i mbetet Prokurorisë të hetojë vërtetësinë e kësaj videoje.