Presidenca: Keqardhje për raportin, keqpërdorim
Freedom House: Jemi institucion jopartiak, bëjmë analizat tona
Pas akuzave që raporti i “Freedom House”, ngriti ndaj Presidentit të Republikës, reagoi zëdhënësi i kreut të shtetit, Tedi Blushi, duke e cilësuar raportin në funksion të axhendave politike.
Në përgjigje të interesimit të mediave lidhur me raportin e fundit të Freedom House, zëdhënësi i Presidentit Ilir Meta, Tedi Blushi, u shpreh: “Keqardhje për keqpërdorimin e këtij raporti të Freedom House në funksion të axhendave të njëanshme politike në vendin tonë. Zgjedhja e Presidentit Meta është realizuar në një proces tërësisht kushtetues dhe demokratik me një shumicë mbi 3/ 5- at e votave dhe në një moment kyç për stabilitetin e vendit dhe zgjidhjen e krizës politike parazgjedhore”, thuhet në reagimin e zëdhënësit të Presidentit të Republikës. Sipas zyrës së kreut të shtetit, korrupsioni mund të hetohet nga Freedon House, duke filluar me porositësit dhe ata që kanë ndikuar që ky raport të ketë deformime të tilla. “Në mënyrë të sforcuar dhe të njëanshme ky raport, jo vetëm deformon këto të vërteta, por në mënyrë spekulative dhe të qëllimshme kërkon të krijojë fokuse artificiale. Nëse Freedom House është i interesuar vërtet të hedhë dritë mbi korrupsionin në Shqipëri, duhet të hetojë në mënyrë të paanshme kush ka ndikuar dhe porositur këto deformime të fakteve dhe të të vërtetave në këtë raport dhe jemi të bindur se aty do të zbulojë simbolet konkrete të korrupsionit kombëtar dhe ndërkombëtar. Për këtë qëllim jemi të hapur të bashkëpunojmë edhe me Freedom House”, përfundon reagimi i zëdhënësit të Presidentit të Republikës, Tedi Blushi. Në raportin e saj vjetor, Freedom House thoshte se lufta kundër korrupsionit mori një goditje me zgjedhjen e Metës në krye të vendit me votat e Partisë Socialiste. “Lufta kundër korrupsionit mori gjithashtu një goditje me zgjedhjen e Ilir Metës si President i Republikës më 28 prill, Presidenca e të cilit u bë e mundur nga votat e Partisë Socialiste”, thuhet në raport. Por Freedom House reagoi dje në mbrëmje pas kërkesës së “Zërit të Amerikës” për këtë reagim nga zyra e Presidentit të Republikës. Drejtori i Komunikimit në këtë organizatë, Robert Ruby, u shpreh se të gjitha palët duhet ta lexojnë të gjithë raportin e Freedom House. “Ne inkurajojmë të gjitha palët ta lexojnë të gjithë raportin, i cili përfshin shqetësime të hollësishme rreth korrupsionit dhe kapjes së shtetit në Shqipëri mes aktorëve të shumtë në sferën politike, rreth përparimit të ngadalshëm në krijimin e institucioneve të nevojshme për luftën kundër korrupsionit dhe rreth një kornize të pamjaftueshme për të siguruar pavarësinë e këtyre institucioneve. Freedom House është një institucion jopartiak dhe konkluzionet e saj pasqyrojnë analizat që ajo bën vetë”, u shpreh Robert Ruby.