Byroja nuk dënoi Ramën, opozita vendos të mos e lejojë të flasë në Kuvend
Qëndrimet e Bashës në grup dhe kërkesat që deputetët e PD do kenë për Ramën sot në seancë, paralajmërohet tension
LSI do të apelojë sot në Parlament lirimin e 11 të të arrestuarve në protestën e Rrugës së Kombit. Kreu i Grupit Parlamentar të LSI- së, Petrit Vasili, deklaroi se në seancën e sotme LSI do të jetë shumë aktive dhe do të kërkojë lirimin e të arrestuarve. “I gjithë grupi parlamentar do të jetë atje, shumë aktiv, shumë i tonizuar për t’u përballur pikërisht me qeverinë, me Kryeministrin dhe më të gjithë negativitetin pafund, që kjo qeverisje po prodhon vazhdimisht në dëm të qytetarëve. LSI shprehet se do të qëndrojë në mënyrë të papajtueshme në këmbë, me të gjitha format e reagimit, jo vetëm të protestës, krijimit të një ndjeshmërie ndërkombëtare, Bashkimit Europian, Shtetet e Bashkuara të Amerikës, kudo gjetkë dhe së bashku me të gjithë qytetarët për lirimin e menjëhershëm të të arrestuarve për shkak të protestës së Kukësit, pasi Kryeministri i vendit e pranoi i zënë prej gryke, që është ai fajtori kryesor, dhe natyrshëm të pafajshmit ndodhen sot në burg. Dhe deri ditën e lirimit të tyre, protestat dhe reagimi ynë nuk do të rreshtin”, deklaroi Vasili. Kreu i grupit parlamentar u shpreh se LSI do të mbështesë protestën e biznesit të vogël për përfshirje në skemën e TVSH- së. “Grupi analizoi dhe përshëndet protestën masive të bizneseve të vogla, thënë më thjesht dhe me qartë për të gjithë qytetarët, bizneset e mbijetesës, pra, përfundimisht ato nuk mund të quhen më biznese të vogla, por biznese mbijetese, sepse të tilla janë. Dhe njëkohësisht, përshëndet jo vetëm ndërgjegjen e lartë qytetare, jo vetëm fuqinë e reagimit qytetar dhe papajtueshmërinë me arbitraritete, me të keqen, me tendencën e hapur të qeverisë për të grabitur të varfrit në emër të pasurimit të oligarkëve dhe mashtrimit sistematik dhe të pacipë që i bëhet asaj nga qeveria, nga ministrat, nga Kryeministri vetë, lidhur me taksat skllavëruese, kundër të cilave janë dhe institucionet ndërkombëtare, si Fondi Monetar Ndërkombëtar, e që kanë synim asgjësimin e biznesit të vogël për pasurimin e oligarkëve, tashmë pushtues dhe që kanë në dorë qeverisjen e këtij vendi”, tha Vasili.