SHBA shpall “non grata” deputetin Tom Doshi dhe familjen: “Është i korruptuar”
DEPUTETI I MAXHORANCES: JAM OPOZITAR, S’KAM FIRMOSUR TENDERA
Departamenti Amerikan i Shtetit ka shpallur dje si person të padëshiruar deputetin e maxhorancës Tom Doshin dhe familjen e tij.
Tom Doshi është zgjedhur në vitin 2017- të deputet në Qarkun e Shkodrës me siglën e Partisë Socialdemokrate, e cila ka si kryetar Skënder Gjinushin. Doshi, që nga rizgjedhja në Parlament ligjërisht është deputeti pa grup parlamentar, por ai ka votuar rregullisht të gjitha nismat e Qeverisë “Rama”. Në argumentin ligjor të Departamentit Amerikan të Shtetit theksohet se deputeti i Shkodrës shpallet i padëshirueshëm për shkak të “angazhimit të tij në korrupsion”. Sipas deklaratës së DASH- it, Tom Doshi është shpallur si i padëshirueshëm dhe nuk do të lejohet të hyjë në territorin e Shteteve të Bashkuara. Në bazë të ligjeve amerikane, kur Sekretari i Shtetit ka informacione të besueshme se një zyrtar i huaj është përfshirë në raste madhore korrupsioni ose shkelje të të drejtave të njeriut, atij dhe familjes së tij të ngushtë i ndalohet hyrja në Amerikë. Sekretari i Shtetit mund t’ia bëjë njoftimin zyrtarit privatisht ose në publik. Në bazë të njoftimit të DASH- it, “deputeti Doshi, bashkëshortja e tij Xhovana Doshi, vajza e madhe Briana Doshi, djali në moshë madhore James Doshi dhe fëmijët në moshë të mitur, nuk lejohen të hyjnë në Amerikë”. REAGIMI DOSHIT Deputeti i PDS- së ka folur dje rreth vendimit të DASH- it, teksa ka thënë se nuk ka pasur dijeni për këtë vendim dhe se njoftimin e kishte marrë nga mediat. Në një intervistë për “News 24”, Doshi ka thënë se familja e tij disponon pasaportë australiane dhe asnjëri prej tyre nuk ka shkuar në Amerikë. Ai ka sqaruar se i është refuzuar viza më parë, pasi ka pasur konflikt me ish- Kryeprokurorin e Përgjithshëm, Adriatik Llalla. “Jo, jo s’e dija. Hala s’kam mbaruar drekën. E para, fëmijët e mi kanë pasaportë austra- liane, s’kanë nevojën për vizë amerikane. As gruaja ime dhe as fëmijët e mi s’kanë qenë në Amerikë. Unë kam qenë në Amerikë, kam aplikuar në ambasadë kur kam qenë në hetim, siç e dini. Nuk më është thënë që më refuzohet kërkesa. Unë kisha një konflikt me Kryeprokurorin ( Adriatik Llallën) siç dihet. Dhe këtu ngeli çështja, vetëm te kërkesa. Për punë korrupsioni s’kam firmosur asnjëherë. Jam opozitar, s’kam qenë kurrë në pushtet”, ka thënë ai. Lidhur me akuzat për korrupsion, Doshi ka thënë se: “Me bë korrupsion, duhet të jesh ministër, kryeministër. Unë s’kam pas ndonjëherë dhe s’kam për të pas ndonjëherë nevojë. Unë e kam deklaruar pasurinë teme qysh në vitin 2005 dhe s’jam marrë asnjëherë me tendera dhe s’kam pasur lidhje ndonjëherë me këto. Çdo gjë që kam ba, jam taksapaguesi më i madh në Shqipëri me kompanitë që kam. Unë jam i pastër dhe s’kam frikë dhe as s’jam i shqetësum. Kam pas një shtet kundër, ju e dini shumë mirë, jam arrestuar në mënyrë të paligjshme”.
IRONIA Në prononcimin e tij, Tom Doshi ka ironizuar ishKryeprokurorin Llalla për të cilin tha se ai nuk ka të njëjtat probleme me korrupsionin siç ka ish kreu i akuzës. Këto sulme ai i ka quajtur si politike. “As që e kam ndërmend me u marrë me këtë punë. E ndiej veten të pastër, nuk kam probleme si Adriatik Llalla që merret me korrupsion. Unë do kërkoj të drejtën time, kjo është arsyeja për sot. Një akuzë e tillë… ata po akuzojnë Trumpin, ju e shihni se si CNN- ja sulmon Trump- in tash dy vjet, që ‘ ka blerë zgjedhjet’, ka blerë kët, ka lidhje me rusët, edhe ai vazhdon e drejton si President. Pse i bëni kaq të madhe ( Qesh). Këto janë gjëra që ndodhin për ditë. Dihet, kush është në politikë, do goditet”, u shpreh Doshi.