Basha nxjerr videon e arrestimit të kuksianëve
“Krim shtetëror, rrëmbimi dhe burgosja e paligjshme e qytetarëve”
Kryetari i Partisë Demokratike, Lulzim Basha, bëri publike videon e arrestimit të qytetarëve kuksianë në orët e para të mëngjesit, duke e cilësuar të paligjshëm. Basha i cilësoi këto arrestime një krim shtetëror. “Ky krim shtetëror tregon qartë se në Shqipëri është instaluar një polici dhe prokurori politike dhe ekstraligjore, e cila shkel dhe dhunon të drejtat kushtetuese të qytetarëve shqiptarë, sepse është vënë në shërbim të regjimit të Edi Ramës. Misioni i këtyre institucioneve të kapura nuk është lufta kundër krimit dhe korrupsionit, por lufta kundër çdokujt që rrezikon apo kundërshton regjimin e Edi Ramës. Krimi shtetëror i rrëmbimit dhe burgosjes së paligjshme të qytetarëve të pafajshëm kuksianë duhet të ndëshkohet”, shkruan Basha në “Facebook”. Kreu demokrat tha se PD është me kuksianët, duke u bërë thirrje qytetarëve që të rivendosin bashkë demokracinë dhe drejtësinë në vend. “Kjo është thirrje për një reagim popullor kundër padrejtësisë ndaj kuksianëve kurajozë, që mbahen si kriminelë në burg, ndërkohë që kriminelët e vërtetë janë të lirë. Ne jemi me kuksianët. Ne jemi me popullin. Ky regjim kriminal duhet të ndalet dhe se bashku duhet të rivendosim demokracinë, drejtësinë dhe dinjitetin e njerëzve të thjeshtë”, shkruan Basha. Disa orë më vonë, nënkryetari i PD- së, Edi Paloka, i kërkoi Edi Ramës lirimin e protestuesve Kuksianë, duke akuzuar Policinë se BANORË të Kukësit u mbajtën në “arrest me burg” pas përplasjes së dhunshme, gjatë protestës në pikën e pagesës së tarifës së rrugës Milot- Morinë, ku si pasojë u dogjën sportelet e firmës koncesionare arrestimet e tyre janë bërë në kundërshtim me ligjin. “Disa prova që janë paraqitur, tregojnë qartazi se qytetarët e Kukësit janë rrëmbyer nga shtëpitë e tyre në kundërshtim me ligjin dhe të drejtat e njeriut, në mes të natës, në mënyrën më shtazore. Pas këtij akti, Prokuroria, që është në duart e Edi Ramës, guxoi të falsifikonte orën se kur qytetarët e Kukësit u rrëmbyen. Forcat e Fatmir Xhafës, si banditë të maskuar, janë sulur dhe kanë rrëmbyer në shtëpitë e tyre qytetarët e Kukësit. Rrëmbyen ata qytetarë që protestuan për të drejtën e tyre, për bukën e gojës”, u shpreh Paloka. Ai i kërkoi Kryeministrit Rama të lirojë kuksianët e arrestuar dhe të arrestojë politikanët e korruptuar. “Nuk do të ketë qetësi për Edi Ramën deri kur qytetarët e Kukësit do të gjejnë drejtësi. Të jetë i bindur Edi Rama, se ne si opozitë, në çdo moment do të vazhdojmë të jemi në krah të protestuesve kuksianë. Derisa i fundit prej tyre të lirohet, nuk do të ketë qetësi për Edi Ramën. Edi Rama të lirojë kuksianët dhe të arrestojë politikanët të lidhur me trafikun e drogës, nga i vëllai, te Saimir Tahiri”, tha Paloka.