“Universitetet, më shumë para për luks se për studentët”
Universitetet shqiptare rezultojnë të jenë më pranë luksit sesa studentëve e shkencës. Ky është konkludimi i monitorimit të transparencës financiare për 6- mujorin e fundit në tre universitete: atë të Tiranës, Elbasanit dhe Durrësit. Sipas të dhënave të siguruara nga organizata rinore “Qëndresa qytetare”, e cila ka realizuar edhe studimin, institucionet e mësipërme nuk kanë shpenzuar asnjë lekë për studime dhe kërkime përgjatë periudhës shtator 2017- mars 2018. Por, kur vjen puna te zyrat, nuk mund të thuhet se s’ka pasur fonde. Më konkretisht, “Aleksandër Moisiu” në Durrës rezulton të ketë shpenzuar 15 milionë lekë për pajisje zyrash për titullarët, ndërsa Universiteti i Tiranës 39.268.777 lekë për likuidime të punonjësve të hequr padrejtësisht nga puna për faj të titullarëve. Në anën tjetër të medaljes janë studentët, për të cilët është shpenzuar 0 lekë. Nga analiza e transaksioneve të institucioneve të mësipërme del se UT- ja, ndonëse është universiteti më i madh, ka shpenzuar rreth 4.5 herë më pak se dy të tjerët. Kjo, për shkak të ngërçit të krijuar midis rektorit dhe bordit të administrimit. Situata e fundit ka çuar në rritjen e shpenzimeve për zgjidhjen e këtyre problematikave në rrugë gjyqësore. Universiteti i Tiranës rezulton të ketë shpenzuar 39.268.777 lekë për shpenzime gjyqësore, ai i Durrësit 7.5 milionë, ndërsa universiteti i Elbasanit 0 lekë. Nisur nga kjo situatë, “Qëndresa qytetare” i rekomandon Kontrollit të Lartë të Shtetit dhe Prokurorisë të ndërhyjnë menjëherë nëpërmjet auditimit ligjor për të zbutur shpenzimet abuzive të pajustifikuara dhe të realizuara jashtë kategorive të parashikuara në buxhet, ndërsa i bën thirrje Ministrisë së Arsimit të monitorojë dhe instruktojë skemën e shpërndarjes së të ardhurave në investime dhe shërbime në bazë të një modeli të paracaktuar.