Policia Bashkiake, Veliaj: Kemi ndryshuar cilësinë e shërbimit
Policia Bashkiake, në tre vitet e fundit ka ndryshuar jo vetëm imazhin, por edhe cilësinë e shërbimit. I këtij mendimi është kryetari i bashkisë, Erion Veliaj. “Gjenerata e policëve bashkiakë nuk ka ndryshuar vetëm imazhin, por mbi të gjitha cilësinë e shërbimit. Gjithmonë ka njerëz që mundohen të gjejnë një cen te Policia e Shtetit apo Policia Bashkiake. Por, po të shohim sa rrugë kemi bërë dhe ku e morëm si shtetin, si qytetin, them se më e mira është përpara. Kemi bërë mjaftueshëm për t’i rrahur shpatullat njëritjetrit edhe për ta falënderuar”, u shpreh ai një ditë më parë gjatë aktivitetit për certifikimin e 25 punonjësve të parë nga Akademia e Sigurisë. Me këtë rast, Veliaj reklamoi edhe punën e policëve të shtetit, që së bashku me ata të bashkisë, e kanë ndryshuar për mirë nivelin e sigurisë në kryeqytet. “Një nga arsyet pse të huajt që vijnë raportojnë për një qytet perëndimor, është pikërisht se shikojnë trotuare të lira, prona publike të pavandalizuara, shikojnë një qytet ku njerëzit respektojnë semaforin, vijat e bardha, ku shohin një polic të shtetit apo të bashkisë që ndihmon fëmijët që kalojnë trotuarin. Përshtypja që jep qyteti përkthehet në një shkrim, i cili lexohet nga miliona të tjerë që nesër vijnë turistë, sjellin para për ekonominë”. Në bazë të marrëveshjes së nënshkruar midis Bashkisë së Tiranës dhe Ministrisë së Brendshme, efektivët e Policisë Bashkiake po ndjekin një program mësimor që do të formojë dhe zhvillojë më tej aftësitë teoriko- profesionale, në shërbim të qytetarëve.