Avokati i Llallës për hetimet: Nëse ka, janë të parregullta
Prokuroria e Durrësit: Llalla po hetohet për 4 vepra penale
Edhe pse burime zyrtare nga Prokuroria e Durrësit kanë konfirmuar procedimin penal ndaj ish- Kryeprokurorit Adriatik Llalla, avokati i tij, Sokol Hazizaj, thotë se nuk është vënë në dijeni të një hetimi të tillë.
Ditën e djeshme, Hazizaj foli për mediat jashtë godinës së Gjykatës së Krimeve të Rënda ku tha se nuk kishte marrë informacion në lidhje me hetimet ndaj Llallës. Ai shtoi se nëse ka vërtet një hetim, atëherë ai është i parregullt. “Sa kohë që në cilësinë e mbrojtësit ligjor nuk kam marrë informacion për nisjen e një procedimi penal, ose hetimi ndaj shtetasit Adriatik Llalla, nuk mund të them që ka nisur ose jo. Kjo është rruga ligjore dhe çdolloj dyshimi mbi këtë, e çon procesin në parregullsi”, ka thënë Hazizaj ditën e djeshme. Mirëpo, pavarësisht se avokati pretendon që s’ka marrë informacion nga Prokuroria e Durrësit për hetime ndaj Llallës, kjo e fundit ka nisur hetimet që në mars. “Panorama” mëson nga burime zyrtare në Prokurorinë e Durrësit se ish- numri një i organit të Akuzës po hetohet për katër vepra të ndryshme penale. Të njëjtat burime saktësojnë se procedimi penal ndaj Llallës ka nisur më 15 mars të këtij viti. Veprat penale për të cilat po hetohet Llalla përfshijnë “refuzimin për deklarim, mosdeklarim, fshehjes ose deklarimit të rremë të pasurisë”, “mosdeklarim të shumave të të hollave në kufi”, “pastrim të produkteve të veprës penale” dhe “shpërdorim detyre”, të parashikuar nga nenet 257/ a, 179/ a, 287 dhe 248 të Kodit Penal. Deri më tani, dihet se ndaj Llallës ka nisur verifikimi pasuror për shitjen e disa pronave dhe se ka mospërputhje sa i përket shumave të deklaruara. Vetë ish- Kryeprokurori hoqi dorë nga privilegji ligjor për t’u zgjedhur gjyqtar në Apelin e Tiranës pas përfundimit të mandatit të tij në krye të Prokurorisë dhjetorin e shkuar. Në këtë mënyrë, Komisioni i Pavarur i Kualifikimit, me vendimin e datës 16.02.2018 vendosi që të ndërpresë procesin e rivlerësimit ndaj tij. Mirëpo, një muaj më pas, Prokuroria e Durrësit regjistroi procedim penal për ish- Kryeprokurorin. Edhe vetë Kryeprokurorja Marku, në një intervistë televizive dhënë së fundmi, nuk e mohoi skenarin e hetim- it të ish- Kryeprokurorit. Së fundmi, Prokuroria e Durrësit ka marrë të gjitha deklaratat e pasurisë së Llallës dhënë në ILDKPKI dhe ka konstatuar probleme në to. Sa i përket veprës penale të pastrimit të parave, ka dyshime për shitjen e disa pronave të Llallës dhe për vlerat reale që ishKryeprokurori ka përfituar nga to. Në lidhje me shpërdorimin e detyrës, burimet thonë se në Komisionin e Pavarur të Kualifikimit, kanë mbërritur me dhjetëra denoncime nga qytetarë dhe persona të tjerë, qoftë zyrtarë të administratës apo nëpunës të drejtësisë për shkelje në detyrë të ish- Kryeprokurorit. Të gjitha këto raste denoncimesh janë duke u verifikuar nga Prokuroria e Durrësit. Ambasada e SHBAve në Tiranë ia refuzoi vizën Llallës dhe bashkëshortes së tij dhe në fillim të këtij viti, Departamenti Amerikan i Shtetit doli në një deklaratë zyrtare në lidhje me këtë çështje, ku shpjegonte se revokimi i vizës ishte firmosur edhe nga ish- Sekretari i Shtetit Tillerson, pasi kishte dyshime se Llalla ishte i korruptuar. Përpara kësaj, Llalla ka pasur përplasje me ambas- adorin amerikan Donald Lu. Ky i fundit e akuzoi se po punonte kundër Reformës në Drejtësi, ndërsa Llalla iu përgjigj duke thënë se ambasadori po ushtronte presion të madh ndaj Prokurorisë së Përgjithshme. Lajmin për hetimin e Llallës e konfirmoi në fillim të muajit të kaluar edhe një burim diplomatik për “Deutsche Welle”. Dosja e tij ka kaluar në Durrës, për të shmangur ndonjë konflikt interesi me Krimet e Rënda dhe Prokurorinë e Tiranës.