Prezantohet projekti, si do të transformohet Piramida
Kryeministri: Ngrehinë e trashëguar, lidh fëmijët me teknologjinë
Ndërtesa ikonë e regjimit komunist, Piramida, do të kthehet në një godinë funksionale dedikuar fëmijëve e të rinjve kreativë në teknologji, art e kulturë.
Projekti për rijetëzimin e ish- muzeut të diktatorit Hoxha u prezantua një ditë më parë nga kreu i qeverisë, Edi Rama, një nga financuesit kryesorë të tij dhe kryebashkiaku Erion Veliaj. Për Kryeministrin, godina e Piramidës është dëshmi e të gjitha ngjarjeve të ndodhura çerekshekullin e fundit, ndërsa sot, e cilëson arritje projektin që afron të rinjtë me teknologjinë. “Kjo godinë është fotografia e shtetit që ne trashëguam. Besoj se projekti ka arritur të zgjidhë një pikë kyçe të sfidës, që gjatë gjithë kësaj kohe nuk zgjidhej, midis rilindjes së kësaj godine dhe funksionit të saj. Është një model që arrin të bëjë bashkë dy gjëra, që duken shumë të largëta për njëra- tjetrën, fëmijët dhe teknologjinë”. Për kreun e Bashkisë, godina multifunksionale është dëshmi e përpjekjes që Kryeministrit, dikur opozitar që kundërshtoi me forcë shembjen e tij, vite më përpara dhe që sot është një ndër financuesit e vitalizmit të saj. “Të falënderoj Edi për atë punë atëherë dhe për vizionin se kjo copë prone në vendin më të shtrenjtë të Tiranës mund të kishte këtë dobi, që shumëkush nuk e shihte kur bëhej debati në Parlament para disa vitesh”, theksoi Veliaj.
NDËRTESA E RE Projekti për transformim- in e Piramidës parashikon ndërtimin e një godine me xhama transparentë, duke lejuar dritën të depërtojë në sallat ku do të zhvillohen 14 programe, që nga shkrimi e vizatimi deri te programimet, animacionet e lojërat e ndryshme. Teksa sallat në brendësi të saj do të transformohen rrënjësisht, duke i projektuar në përputhje me veprimtarinë që do të zhvillohet në brendësi të tyre, e vetmja gjë që do t’i qëndrojë besnike të shkuarës është pamja e jashtme me shkallaret, që do të lejojnë sërish të vegjlit të ngjisin e zbresin në muret e saj. Përpos kësaj, qëllimi i projektit është kthimi i saj në një pikë panoramike për qytetin, ku njerëzit ta arrijnë atë nga të gjitha anët e saj. Në godinën në qendër të Tiranës nuk do të mungojë as gjelbërimi. “Piramida aktuale është e mbyllur dhe kjo ndodh për shkak të xhamit reflektues të errët. Ideja e parë është ta hapim atë duke përdorur xhama transparentë. Gjithashtu, duhen hapur xhamat dhe dyert që gjithkush të futet. Duam gjithashtu të vendosim gjelbërim në majë të saj. Ne duam ta bëjmë eficente, të shtojmë volume brenda, ku çdo funksion të gjejë vendin”, citoi një nga arkitektët që do të zhvillojë projektin, dje gjatë prezantimit të tij. Sa i takon anës funksionale, Piramida do të shërbejë si një lloj inkubatori për bizneset në fushën e inovacionit, artit dhe kreativitetit. Kjo do të jetë e para hapësirë ku fëmijëve nga mosha 5 vjeç e deri tek ata të shkollave të mesme që kanë talent, do t’u jepen mjetet dhe njohuritë që iu duhen për t’i zhvilluar ato.