Grizman në “habitatin” e artë, Atletiko i bën tre
Spanjollët perfekt, triumfojnë në çdo finale të kompeticionit
E treta herë në finale dhe spanjollët shtojnë në tre numrin e triumfeve në Europa Ligë.
Mirëpo, si për ironi të fatit, numrat përsëriten me Marsejën, por në aspektin negativ. Francezët, dje në Lion, kanë luajtur të tretën finale të këtij kompeticioni në historinë e tyre, dhe ishte e treta disfatë. Atletiko e Madridit ka triumfuar në Lion, duke e bërë sezonin të suksesshëm me arritjet e deritanishme. Diego Simeone, pas pezullimit të marrë, ishte i detyruar që të mos e drejtonte skuadrën e tij nga stoli. Mirëpo, skemat, taktika, grinta dhe dëshira e "los kolçoneros", bënë të mundur që spanjollët të festonin në Francë.
GOLAT
Një gabim i portierit bëri të mundur hapjen e sfidës. Pasim në rivënien fundore, bëri që Grizman të dilte në hyrje të zonës dhe duke kaluar portierin në krahun e kundërt, shënon të parin gol. ishte minuta e 21- të dhe ky episod do të mjaftojë deri në fund të këtij fraksioni. Në pjesën e dytë, ishte sërish francezi që ndryshoi shifrat e takimit. Një kundërsulm i Atletikos, dhe francezi gjendet në zonë, ku i duhet të driblojë dhe të kalojë portierin kundërshtar me një parabolë të lehtë. Atletiko e çon në 2- 0 dhe deri në fund, Marseja tenton të pamundurën. Gabi vulos sfidën, pasi merr një pasim në zonë, gjuan tokazi dhe shënon, 3- 0. Zëvendësimi i Pajet në pjesën e parë për shkak dëmtimi, e konfirmoi akoma më shumë së është e Pamundur. Atletiko dhe Diego Simeone janë një binom suksesi për "los kolçoneros"…