Konferenca ndërkombëtare te “Luarasi”, Ahmetaj: Kryereforma, negociatat me BE
“Ndikimi i reformave në zhvillimin e ekonomik, politik e social” Ministri: Do provokojë reforma të pafundme në të gjitha fushat. Ky është përfitimi i parë i vendit në afrimin drejt BE- së
Ndikimi i reformave në jetën sociale, politike dhe ekonomike bënë bashkë dje te Kolegji Universitar “Luarasi” në një konferencë shkencore ndërkombëtare ekspertët më të mirë vendës e të huaj, për të bërë publike punën e tyre kërkimore.
Me këtë veprimtari, “Luarasi” dëshmon se nuk është thjesht një ambient ku mbahen leksione në auditore, por qendër e mirëfilltë kërkimore shkencore. “Pedagogët dhe stafi akademik i Universitetit “Luarasi” është i angazhuar që krahas procesit mësimor, krahas detyrimeve të shumta që ka marrë për ta zhvilluar universitetin, bëjnë edhe punë kërkimore. Sot është rasti që ata të shpalosin disa nga kërkimet që kanë bërë gjatë këtij viti”, nënvizoi rektori i “Luarasit”, prof. Et’hem Ruka në fjalën e prezantimit. Referatet e fushës ekonomike e juridike në të dyja sesionet theksuan se një reformë bazuar në logjikën e ligjit krijon kushte dhe hapësirë për zbatim të reformave ekonomike, garanton një drejtësi të pavarur, barazi para ligjit për të gjithë operatorët e tregut dhe më shumë liri ekonomike e një klimë biznesi të përshtatshme në dobi të zhvillimit te vendit. “Luarasi” është një nga dy universitetet private më të vjetra në vend, që ka shënuar rritje vit pas viti. Jo vetëm në sasi, por edhe cilësi. Këtë e dëshmon edhe raporti i ekspertëve britanikë të akreditimit, ku renditet në katër universitetet më cilësore në vend. Risia e fundit është kalimi nga kolegj universitar në statusin e universitetit, me hapjen e fakultetit të ri “Teknologji informacioni dhe inovacion”.
ROLI I REFORMAVE Pa bërë politikë, por as pa u shmangur tërësisht nga ajo, ministri i Financave dhe Ekonomisë, Arben Ahmetaj, përmendi sukseset e reformave të qeverisë duke vënë në dukje se reforma më e madhe për shqiptarët do të jetë hapja e negociatave me Bashkimin Europian. “Më lejoni ta quaj një nga reformat më të mëdha, që do të provokojë reforma të pafundme në të gjitha fushat e jetës. Ky është përfitimi i parë i vendit në raport me afrimin drejt Bashkimit Europian”. Krejt spontanisht, ministri Ahmetaj iu bëri një ftesë të hapur drejtuesve të “Luarasit” për një bashkëpunim në favor të stafit akademik të “Luarasit” dhe vetë ministrisë. “Le të bëjmë një marrëveshje mes qendrës suaj të kërkimeve shkencore me Ministrinë e Financave, me departamentin makrofiskal ku ju të na sfidoni me researchet tuaja të programuara për efektet e reformave”, nënvizoi ministri, i cili nga ana tjetër nuk kurseu vlerësimet për universitetin dhe profesorët e tij që sot janë pjesë e “Luarasit”. “Falënderoj profesor Luarasin, që ka krijuar në gjenezë një qenie akademike fantastike dhe profesorët e tjerë, me të cilët kam punuar qoftë në politikë apo mësimdhënie. Jam i emocionuar sepse jam përpara profesorëve të mi dhe po kaq sepse jam përpara një brezi të ri që të sfidon”. Në fjalën e tij, prof. Dhori Kule, dekan i Fakultetit Ekonomik në Universitetin e Tiranës, u ndal te bashkëpunimi vital midis dy sektorëve, publik e privat. Thënë këtë, referuar jo vetëm sferës akademike, por edhe asaj ekonomike. Sipas Kules, ngulitja e këtij mentaliteti është detyrë e universiteteve. “Bota është zhvilluar pikërisht nga ky bashkëpunim. Sistemi i ri në komandë ka tregun dhe institucionet e tregut duhet të jenë prioritet. Të gjithë duan punë shteti. Shteti ka 85 mijë të punësuar, ndërsa mbi 1 milion i ka tregu. Duhet të ndryshojë kjo mendësi, për të cilën kemi detyrime dhe përgjegjësi të madhe”. Në konferencë nuk u anashkalua edhe Reforma në Drejtësi, sipas dekanit të Fakultetit Juridik, Artan Hoxha, e dyta më e madhe që ka njohur vendi pas reformave të viteve ’ 90. Sipas profesorëve në panel, suksesi i saj do të jetë themeli i reformave të suksesshme ekonomike dhe garanci për më shumë drejtësi ekonomike dhe sociale. Një fjalë përshëndetëse mbajti edhe profesor Hans Schumman nga Universiteti i Teksasit, i cili prej dy muajsh është pranë “Luarasi” për të ndarë përvojat më të mira dhe mbajtur leksione të hapura me studentët.