Dëshmitari: Disa ditë më parë thyen llambat e ndriçimit në rrugë
Grabitja e mbrëmjes së të mërkurës në Prokurorinë e Durrësit, duket se ka qenë e planifikuar dhe e organizuar nga autorët e ngjarjes. Madje, një sinjal dyshohet se është dhënë para 10 ditësh, edhe pse u kalua si një incident i rëndomtë dhe nuk u regjistrua as si procedim nga autoritetet lokale. Mbrëmjen e 15 majit, rreth orës 22: 00, disa qytetarë, banorë të zonës pas Prokurorisë së Durrësit, pikërisht nga vendi ku mendohet se janë futur hajdutët, lajmëruan Policinë për dëmtimin e llambave të ndriçimit. Policia shkoi menjëherë në vendngjarje, por autorët, që mendohet se ishin 3 të mitur, kishin arritur të largoheshin. Një prej dëshmitarëve, që ka lajmëruar Policinë atë mbrëmje është edhe juristi Elvin Kurti. Ai ka pikasur njërin prej autorëve teksa thyente ndriçimin e rrugës pranë Prokurorisë. “Konstatova një person. Ai, mesa pashë unë, ishte vetëm dhe po thyente llambat e ndriçimit që ndodhen pranë Prokurorisë. Mendova mos ishte ndonjë fëmijë. Por më pas edhe banorë të tjerë kishin lajmëruar Policinë. Kur sot ( dje) dëgjova që është vjedhur Prokuroria nga persona ende të paidentifikuar. Të them të drejtën, unë atë natë pikasa vetëm një person, i cili thyente llambat e ndriçimit”, u shpreh Kurti. Të tjerë dëshmitarë të asaj nate e lidhin incidentin me ngjarjen që ndodhi në Prokurori. Sipas tyre, ky mund të ketë qenë plan i grabitësve për të realizuar vjedhjen pa u parë nga njeri. Duke lënë zonën në errësirë, sipas tyre, ata mund të kenë menduar se e kanë më të lehtë të depërtojnë brenda am- bienteve të Prokurorisë, pa u pikasur nga dëshmitarët apo rojet. Madje, ata thonë se kjo nuk mund të jetë një koincidencë. Pasi, pikërisht në vendin që ata përdorën për t’u futur brenda, në anën e pasme të godinës, aty ku është kabina elektrike, ndodheshin llambat e ndriçimit që u goditën.