Grabitja e Prokurorisë, Alibeaj: Shteti është kapur nga krimi
Në një deklaratë pas grabitjes së ndodhur në Prokurorinë e Durrësit, Partia Demokratike thotë se shteti është kapur nga krimi. Enkelejd Alibeaj, në një dalje për mediat, tha se edhe për ngjarjen e parë, kur u grabitën dokumente të rëndësishme të kësaj Prokurorie, nuk u mbajt asnjë përgjegjësi nga prokurorja e rrethit në atë kohë, Donika Prela. “Para 2 javësh, kësaj Prokurorie iu grabitën dokumente të rëndësishme të hetimeve penale. Kryeprokurorja e Durrësit, Donika Prela, jo vetëm që nuk mbajti përgjegjësi, por u gradua nga shoqja e saj Arta Marku, me urdhër të Edi Ramës dhe Fatmir Xhafajt, si kryeprokurore e Krimeve të Rënda, në shkelje flagrante të Ligjit për Organet e Drejtësisë. Ky akt, sigurisht, i ka trimëruar banditët e lidhur me pushtetin. Sot, krimi ia beh mu në mes të zyrave të Prokurorisë dhe i pashqetësuar grabiti serverin e të dhënave të hetimeve penale për çështjet më të rëndësishme të krimit dhe korrupsionit të qeveritarëve. Dje, një i burgosur me rrezikshmëri të lartë u arratis nga salla e gjyqit. Të gjitha këto janë pasoja e kapjes së shtetit nga krimi, shteti i shpartalluar që mbron kriminelët dhe godet njerëzit e thjeshtë”, u shpreh Alibeja. Më tej, ai deklaroi se qeveria po bën ç’është e mundur, për të zhdukur provat e krimit që ka kapur Edi Ramën dhe Fatmir Xhafajt. “Nuk ka si të ndodhë ndryshe, kur provat e vërteta hetimore rrëmbehen nga banditët mu në zemër të Prokurorisë, kur Kryeministri i servir Prokurorisë si prova ato që prodhon Edi Rama në mes të natës, siç ishte prova imagjinare e Edi Ramës, që mbron Agron Xhafajn, vëllanë e Fatmir Xhafajt, i certifikuar nga gjykatat italiane si bos i bandave ndërkombëtare të trafikut të narkotikëve. Nuk ka si të ndodhë ndryshe, kur kërcënohet dhe tentohet të blihet dëshmitari prej bandave të lëshuara me mision nga qeveritarët dhe kërcënohet gazetari që denoncon krimin”, deklaroi dje Alibeaj.