Prokuroria: Hetim pasuror vëllait të ministrit Xhafaj
Hetimet për përgjimin nisën tri ditë pas publikimit të saj
Në një deklaratë zyrtare, Prokuroria e Krimeve të Rënda ka sqaruar ditën e djeshme se procedimi penal për përgjimin e publikuar nga Partia Demokratike është regjistruar më 17 maj, pra, tri ditë pas publikimit të tij në media.
Ky procedim, sipas Prokurorisë, është regjistruar për veprën penale të “Trafikimit të narkotikëve”, një javë pasi nisi verifikimet për akuzat e PD- së ndaj Agron Xhafajt. Gjithashtu, Prokuroria e Krimeve të Rënda njoftoi dje se ka nisur edhe hetimi pasuror për Agron Xhafajn, në kuadër të ligjit antimafia. Por Prokuroria nuk tha asgjë nëse ky hetim pasuror përfshin edhe ministrin Xhafaj, si familjar i Agronit. Prokuroria sqaroi gjithashtu se hetimet po kryhen nga i njëjti prokuror edhe për kallëzimin e Agron Xhafajt ndaj tri zyrtarëve të PD- së për “Kallëzim të rremë”. Gjithashtu, sipas organit të akuzës, materiali origjinal i përgjimit është dërguar për analiza jashtë vendit, për të përcaktuar nëse është i montuar apo i paprekur dhe nëse protagonistët janë Agron Xhafaj etj. “Prokuroria pranë Gjykatës së Shkallës së Parë për Krime të Rënda njofton se më datë 17.05.2018 ka regjistruar procedimin penal Nr. 95/ v. 2018 për veprën penale të “Trafikimit të narko- tikëve” parashikuar nga neni 283/ a i Kodit Penal. Më datë 18.05.2018 me këtë procedim është bashkuar dhe procedimi penal Nr. 3853 i Prokurorisë Pranë Gjykatës së Shkallës së Parë Tiranë, i regjistruar për veprën penale të “Kallëzimit të rremë”, parashikuar nga neni 305 i Kodit Penal”, shkruan njoftimi i Prokurorisë së Krimeve të Rënda. “Hetimet në këtë procedim penal lidhen me të dhënat e bëra publike më datë 14.05.2018 në një konferencë për shtyp të organizuar në selinë e Partisë Demokratike të Republikës së Shqipërisë, ku është publikuar një material video. Nga biseda e bërë publike midis dy personave, njëri i cilësuar si “Bashkëpunëtori X” dhe një personi tjetër i supozuar si shtetasi Agron Xhafaj është treguar se bashkëpunëtori është ndihmuar nga shtetasi Agron Xhafaj për të siguruar një sasi kanabisi për ta trafikuar. Hetimet po kryen nga një grup hetimor i përbërë nga dy prokurorë dhe dy oficerë të Policisë Gjyqësore të Prokurorisë së Krimeve të Rënda, Tiranë. Janë duke u kryer veprime hetimore të gjithanshme brenda dhe jashtë vendit. Po kështu, është dërguar për ekspertim materiali i video- përgjimit në laboratorë ndërkombëtarë jashtë vendit. Gjithashtu njoftojmë se ka filluar dhe kryerja e verifikimeve pasurore për shtetasin Agron Xhafaj, i ditëlindjes 08.06.1975, me kombësi dhe shtetësi shqiptare, lindur dhe banues në Vlorë”, përfundon njoftimi.