Maxhoranca voton rezolutën e integrimit pa opozitën
“Raporti i KE njeh qartë arritjet në luftën kundër krimit”
Maxhoranca ka miratuar dje vetëm me votat e saj rezolutën “Për rekomandimin e Komisionit Europian për hapjen e negociatave të anëtarësimit midis Bashkimit Europian dhe Shqipërisë”.
Opozita nuk ka marrë pjesë në këtë votim, pasi prej disa javësh ka vendosur marrëdhëniet e kushtëzuara me Kuvendin. Rezoluta e votuar dje me 73 vota pro dhe asnjë kundër është hartuar nga deputetët e Partisë Socialiste dhe nuk u diskutua më parë në Komisionin e Integrimit Europian apo në Këshillin Kombëtar të Integrimit. Këto janë dy nga strukturat përgjegjëse, në të cilat propozohet për diskutim, amendohen dhe miratohen rezolutat e integrimit. Dje, gjatë seancës opozita qëndroi në sallë vetëm për të paraqitur vendimin e saj politik për të shkarkuar ministrin e Brendshëm, Fatmir Xhafaj, dhe për të ftuar qytetarët në protestën e së shtunës. Në emër të maxhorancës, Taulant Balla tha se do të donte që kjo rezolutë të votohej bashkë me opozitën, por detyra e PS- së është të çojë integrimin përpara. “Do kisha dashur shumë, edhe një herë, që këtë rezolutë ta votonin edhe deputetët e opozitës, megjithatë detyra jonë është që këtë proces ta çojmë përpara!”, tha Balla.
REZOLUTA Në rezolutën e votuar nga Partia Socialiste, tre deputetët e PDIU- së dhe dy deputetëve të pavarur, Tom Doshi dhe Robert Bitri, thuhet se Kuvendi i Shqipërisë mirëpret raportin e Komisionit Europian për shkallën e përgatitjes së arritur nga Shqipëria. Më tej cilësohen si arritje pozitive Reforma në Drejtësi, lufta kundër korrupsionit, krimit të organizuar. “Vlerëson rekomandimin e Komisionit Europian për hapjen e negociatave të anëtarësimit mes Republikës së Shqipërisë dhe Bashkimit Europian, si njohje të qartë të arritjeve të Shqipërisë në ndërtimin e shtetit të së drejtës, e specifikisht në Reformën në Drejtësi, luftën kundër krimit të organizuar dhe korrupsionit, reformën në administratën publike dhe mbrojtjen e të drejtave të njeriut”, thekson rezoluta. Më tej, në një pike tjetër i kërkohet qever- isë që “Të thellojë dhe përshpejtojë ritmin e reformave të ndërmarra, veçanërisht të reformave që lidhen me sundimin e ligjit. Shpreh vullnet të plotë për të ecur në rrugën e reformave në frymën e mirëkuptimit ndërpartiak dhe në bashkëpunim të plotë me shoqërinë civile”.