Profesori i Universitetit të Barit: “Luarasi”, një ndër më cilësorët në Shqipëri
Kolegji Universitar “Luarasi” së shpejti do të bashkëpunojë edhe me universitetin “Aldo Moro” të Barit. Profesor Gaetano Dammacco, pjesëmarrës në këtë konferencë, që prej vitesh shërben si urë komunikimi midis universiteteve shqiptare e italiane, e vlerëson “Luarasin” si një ndër universitet më cilësore të vendit. “Hera e parë kur kam ardhur te “Luarasi” ishte në një tjetër seli, në një vend të vogël dhe vij sot një ambient shumë të madh. Nuk është me rëndësi vetëm ndryshimi i godinës, por edhe rritja e dimensionit të “Luarasit”, nga një fakultet tashmë kemi 3. Në këtë aspekt, në panoramën e universiteteve publike shqiptare, “Luarasi” është një ndër ato universitete cilësore që Shqipëria disponon”, nënvizoi prof. Dammacco. Profesori italian thotë se një nga arsyet e pranisë te “Luarasi” është thellimi i bashkëpunimit dhe shkëmbimit midis dy universiteteve, jo vetëm me studentët, por edhe në didaktikë si dhe elementet e tjera që lidhen me pjesën kërkimore dhe shkencore të universiteteve. Kjo, në mënyrë që bashkëpunimi universitar të ketë si objektiv përfundimtar rritjen e cilësisë së jetës të vendeve tona. “Një sfidë e universiteteve jo vetëm shqiptare, por dhe italiane, është niveli i ndërkombëtarizimit në bashkëpunim. Në rastin e Italisë, situata i ngjan pullave të një leopardi pasi ka vende ku ka bashkëpunim dhe të tjera ku mungon, nënvizon profesori italian duke treguar disa nga detajet e bashkëpunimit. Duke parë këtë realitet te “Luarasi”, Dammacco ka marrë përsipër që këtë universitet ta përafrojë me atë të Barit në bashkëpunime jo thjesht marrëveshje të mbetura në letër, por e konkretizuar me programe të përbashkëta studimi.