PD- LSI “zaptojnë” postet në Bashki, shkarkime në Këshill
Debate mes këshilltarëve, iu heqin mandatin dy anëtarëve të PS
Koalicioni mes Lëvizjes Socialiste për Integrim dhe Partisë Demokratike kanë marrë çdo post nën kontroll në Bashkinë Gjirokastër.
Së fundmi, bashkimi i votave mes këtyre dy forcave politike, i ka hequr PS- së edhe sekretarin e Këshillit Bashkiak. Mbledhja e fundit është shoqëruar me debate të forta, pasi, përveç votimit për shkarkimin e Semi Golemit si sekretar, u votua dhe për heqjen e mandatit për dy anëtarë të Këshillit Bashkiak. Kjo ka shkaktuar përplasje mes maxhorancës PD- LSI dhe PS, pasi kjo e fundit pretendon se ligjërisht është e pamundur t’u hiqet mandati anëtarëve të Këshillit, pasi janë të zgjedhur me votë nga populli. Debatet kanë nisur pas votimit për sekretarin e Këshillit Bashkiak. Të majtët kërkuan votim të fshehtë, ndërsa shumica ka votuar dhe miratuar shkarkimin e sekretarit Semi Golemi me votim të hapur. Në vend të tij është zgjedhur Spartak Drasa, përfaqësues i PD- së. Ndërkohë, dy muaj më parë, bashkimi i votave mes LSI- së dhe PD- së bëri që të shkarkohet kryetari i Këshillit Bashkiak si dhe dy nënkryetarët që i përkisnin PS- së. Debate të forta ka shkaktuar kalimi në votim i propozimit për shkarkimin e dy anëtarëve të majtë të Këshillit Bashkiak. Përveçse një gjë e tillë nuk ka qenë e parashikuar në rendin e ditës, PS e ka cilësuar antiligjor një veprim të tillë, pasi anëtarët e Këshillit janë zgjedhur me votë nga qytetarët dhe e humbet mandatin vetëm kur jep dorëheqjen. Bëhet fjalë për Armand Hilën, i cili gjithashtu mban edhe postin e kreut të Këshillit të Qarkut dhe Shkëlqim Guçen. Maskaradë të koalicionit PD– LSI, e ka quajtur këtë veprim kryetari i grupit socialist në Këshillin Bashkiak, Petrit Brahimi. Ai sqaron se anëtarët e Këshillit të Qarkut janë shkarkuar me votim të pabazuar në ligj. Ndërsa për të djathtët, kërkesat dhe vendimi për heqjen e mandatit për dy këshilltarët është e bazuar në ligj, pasi ka si synim barazinë gjinore. Roland Bejko, kryetar i grupit të djathtë u shpreh se, në bazë të ligjit për pushtetin vendor, këshilli bashkiak “zgjedh përfaqësuesit e këshillit bashkiak në këshillin e qarkut, të cilët, në jo më pak se 50 për qind të tyre, duhet t’i përkasin gjinisë më pak të përfaqësuar”. Për Bejkon, me heqjen e mandatit për Armand Hilën, që është dhe kreu i Këshilit të Qarkut, duhet të dorëzojë dhe këtë post, pasi tashmë shumica në pushtetin vendor i takon PD- LSI dhe PS ka humbur shumicën në Këshillin e Qarkut, çka do të sjellë zgjedhje të reja për kryetarin e këtij qarku.