Trump anulon samitin me Kim nga “gjuha armiqësore”
Presidenti paralajmëroi se Ushtria është gati në rast “budallallëku”
Presidenti i SHBAsë, Donald Trump, ka anuluar zyrtarisht samitin me Kim Jong Un të parashikuar për t’u mbajtur në Singapor më 12 qershor, duke ndërprerë fundin e lumtur të historisë që nisi me rrezikun e një lufte nukleare.
Nëse rreziku do të aktivizohet sërish ose do të shuhet në një mundësi të dytë takimi mes liderëve, kjo mbetet për t’u parë. Siç thotë shpesh edhe Presidenti Trump: “Do të shohim!”. Në letrën dërguar Kim Jong Un, Trump ka shkruar se për shkak të gjuhës armiqësore që ka përdorur Koreja e Veriut ndaj SHBA në ditët e fundit, ai ka vendosur të anulojë samitin. “Mjerisht, duke u bazuar në zemërimin e madh dhe armiqësinë e hapur të shfaqur në deklaratën tuaj më të fundit, unë mendoj se është e papërshtatshme, në këtë kohë, që të ketë këtë takim”, ka shkruar Trump në një letër për Kim, e cila u publikua të enjten në mëngjes. Ai ka deklaruar që takimi nuk do të mbahet “në të mirën e dy palëve, por në të keqen e botës”. “Ju flisni për aftësitë tuaja nukleare, por tonat janë masive dhe i lutem Zotit të mos kemi asnjëherë arsye që t’i përdorim”, ka shkruar Trump. Ai gjithashtu paralajmëroi se sanksionet e ashpra kundër Koresë së Veriut do të vazhdojnë, ashtu siç kanë vazhduar deri tani. Presidenti amerikan ka shkruar gjithashtu se, “Ndjeva se një dialog i mrekullueshëm po ndërtohej në mes teje dhe meje dhe në fund të fundit vetëm dialogu ka rëndësi”. Presidenti e falënderoi Kim- in që ka liruar tre qytetarë amerikanë muajin e kaluar. “Ai ishte një gjest i vlerësuar jashtëzakonisht shumë”. Ndërrimi i mendjes së Presidentit rreth samitit me liderin koreanoverior ka qenë i papritur. Në një intervistë të mërkurën e që është transmetuar të enjten në mëngjes në “Fox News”, Trump ka ofruar koncesione ndaj Koresë Ver- iore, duke thënë se ai do të pranonte që çarmatosja të bëhej me faza, madje duke u treguar edhe kontradiktor me zyrtarët e punëve të jashtme të administratës së tij. Por, Presidenti Trump tha pak orë pas anulimit të samitit të planifikuar për çarmatim bërthamor me Korenë e Veriut, se ngjarja e planifikuar për në 12 qershor në Singapor nuk është plotësisht “e vdekur”. Por ai paralajmëroi Kim Jong Un se ushtria e Shteteve të Bashkuara është e gatshme të hidhet nëse ai përpiqet të bëjë çfarëdolloj “budallallëku”. “Shpresojmë se gjithçka do të funksionojë mirë me Korenë e Veriut dhe mund të ndodhin shumë gjëra, duke përfshirë edhe faktin se ndoshta, ( dhe ne do të presim) është e mundur që samiti ekzistues të ndodhë ose të mbahet një samit në një datë të mëvonshme”, tha Trump. “Askush nuk duhet të jetë i shqetësuar”, këshilloi ai. “Ne duhet ta bëjmë atë që është e drejtë”.