Protesta, Rama: Populli tregoi që nuk është dele
Rama: Faleminderit demokratëve, që refuzuan ‘ babaleprotestën’
Kryeministri Edi Rama ka ironizuar dje protestën e opozitës, duke falënderuar të gjithë demokratët që, sipas tij, refuzuan ftesën e Partisë Demokratike për të qenë në tubim.
Në një status në “Facebook”, Rama e ka quajtur si “babaleprotestë”, marshimin e opozitës dhe kërkesat për largimin ministrit të Brendshëm, Fatmir Xhafaj. Sipas kreut të qeverisë, Partia Demokratike po dëmton Shqipërinë për interesa partiake. “Faleminderit të gjithë atyre demokratëve, të cilët nuk duan ta shohin me sy qeverinë, po e refuzuan ftesën për të marrë pjesë në babaleprotestën sa qesharake, aq edhe të pabesë ndaj çdo shqiptari e shqiptareje, që nuk pranon të dëmtojë Shqipërinë për babalepartinë”, thuhet në statusin e Kryeministrit. Gjatë kohës që në Tiranë po zhvillohej protesta, Edi Rama ishte në Berat ku po prezantonte projektet e reja zhvillimore të këtij qarku. Ai nuk e ka komentuar zhvillimin e protestës, por ka thënë se qeveria e tij do të vazhdojë punën. “Ajo që na duhet është të fokusohemi dhe teksa qentë lehin, ne të vazhdojmë të ecim përpara”, ka thënë ai.
REAGIMET Ndërkohë që pas përmbylljes së protestës, Rama ka debatuar dhe me ndjekësit e tij në faqen e “Facebook”. Një prej protestuesve ka kërkuar nga Rama që të mos e quajë popullin dele dhe se shumë shpejt do të vijë dita që Kryeministri do të japë llogari. Por në përgjigjen e tij, kreu i qeverisë ka thënë se ai po jep llogari qytet me qyet dhe çdo fshat. “Kjo protestë tregoi fiks që populli nuk është dele, prandaj nuk doli sot e s’ka për të dalë kurrë për të shkuar pas barinjve gënjeshtarë e të pabesë!
Sa për radhën time, të siguroj që s’kam dhe s’do kem asnjë llogari tjetër për të dhënë, përveç llogarisë që po japim këtë periudhë qytet me qytet e fshat me fshat, e që do ta japim çdo maj- qershor gjatë gjithë këtij mandati. Ato shumë arsyet e tua, shikoji me vëmendje se kam merak mos zhgënjehesh shumë, kur të kuptosh që s’kanë asnjë lidhje me mua e me punën time”, ka thënë Rama. Kryeministri ka komentuar dhe qëndrimin e vendeve skeptike të BE- së, duke theksuar se hezitimi i tyre varet nga çështjet e brendshme politike. “Vendimin e Francës e Holandës do ta shohim në qershor, por hezitimi i tyre s’ka as edhe një lidhje me ato që thua ti, po me problemet e tyre të brendshme politike dhe këtë e di çdo buf që e ndjek këtë temë, jo me njerëzit e arsyeshëm!”, ka thënë ai.