Pajtohen sërish, Kim Jong Un e Moon Jae- in në samit surprizë
Takimi mes liderëve koreanë, për paqen e samitin Kim - Trump
Udhëheqësi i Koresë së Veriut, Kim Jong Un, dhe Presidenti i Koresë së Jugut, Moon- Jae- in, u takuan për herë të dytë në një muaj për të diskutuar angazhimet e paqes që arritën në samitin e tyre të parë.
Ata gjithashtu folën edhe për takimin e mundshëm të Kim me Presidentin e SHBA, Donald Trump, muajin e ardhshëm. Takimi mes dy drejtuesve koreanë ishte surprizë, pasi pak ditë më parë, Kim Jong Un e anuloi samitin e tyre të dytë për shkak të një stërvitjeje të madhe ushtarake mes SHBA dhe Koresë së Jugut, të cilën Koreja Veriore e quajti provokim. Zyrtarët koreanoveriorë thanë se ka mundësi që të anulohet edhe takimi mes Kim Jong Un dhe Presidentit amerikan Trump. Por Shtëpia e Bardhë njoftoi ato ditë se po vazhdonte planifikimin për takimin e Singaporit mes dy liderëve më 12 qershor. Ishte një deklaratë e zv. presidentit amerikan, Mike Pence, që krahasoi Korenë e Veriut me Libinë, e cila e tensionoi më shumë situatën. Zyrtarët koreanoveriorë u shprehën me një gjuhë dënuese në këtë rast, duke e quajtur zv. presidentin Pence, një injorant. Kundërpërgjigjja nga Shtëpia e Bardhë ishte anulimi i takimit mes Trump dhe Kim, pikërisht pak orë pasi u shkatërrua zona e testimit të raketave nukleare në Korenë e Veriut, ku dëshmuan edhe disa gazetarë që ishin të pranishëm. Pas anulimit të takimit, reagimi nga Koreja e Veriut ishte se ata kanë ende interes për takimin. Dhe kështu, Presideti Trump tha një ditë pasi e anuloi takimin e Singaporit me Kim, se mbase edhe mund të ndodhë, më 12 qershor ose në datë tjetër. Kështu, të shtunën pati një takim të paparalajmëruar mes Kim dhe Moon. Zyra presidenciale e Koresë së Jugut tha se Presidenti Moon do të njoftojë personalisht rezultatin e samitit të së shtunës. Takimi ndodhi përsëri në një fshat armëpushimi kufitar mes dy Koreve. Në samitin e tyre të parë në prill, Kim dhe Moon shpallën aspiratat për një Gadishull Korean pa armë bërthamore dhe paqe të përhershme, të cilat Seuli u përpoq t’i paraqesë si një hap të rëndësishëm për të organizuar samitin me Trump. Pritet që pas këtij samiti, kur Presidenti koreanojugor të flasë për rezultatin, të përmendë edhe takimin e mundshëm mes Kim dhe Trump, që do të ishte takimi i parë në histori mes një Presidenti amerikan dhe një lideri koreanoverior. “Takimi i parë nuk do t’i zgjidhë të gjitha, por edhe sikur mosmarrëveshjet të zgjidhen një e nga një, do të shërbente që marrëdhëniet të bëheshin më mirë, në vend që të përkeqësoheshin”, tha zëvendëskryeministri i Koresë së Veriut, Kim Kye Gwan.