E pamundur që ish- spiuni të jetë helmuar me helm ushtarak

Vladimir Putin tha se është e pamundur që Sergei dhe Yulia Skripal të jenë helmuar me agjent nervor të shkallës ushtarake, pasi do të kishin vdekur menjëherë nëse do të ishte kështu. I pyetur se kush ishte përgjegjës për helmimin e tyre në Salisbury më 4 mars, Presidenti i Rusisë tha se ai dëshironte një hetim objektiv. Qeveria britanike ka fajësuar vazhdimisht Rusinë për sulmin me “Novichok” ndaj ish– spiunit, 66 vjeç dhe vajzës së tij 33 vjeçe. Por Putin këmbënguli se: “Unë nuk jam një ekspert për ata agjentë toksikë të gradës ushtarake, por nëse do të ishte përdorur një substancë e tillë, atëherë viktima vdes menjëherë … në kontakt. Por ky nuk është rasti dhe Sergei Skripal me vajzën e tij janë gjallë. Ata kanë dalë nga spitali tani dhe siç kemi parë në TV së fundmi, vajza e tij është shumë mirë, pra, falë zotit, të gjithë janë gjallë, të gjithë janë mirë. Pra, të thuash se është përdorur një agjent nervor ushtarak, nuk është e mundur dhe kjo hedh dyshime mbi çdo gjë që është thënë nga Mbretëria e Bashkuar që nga fillimi”, tha Putin. Presidenti i Rusisë po fliste për krerët e agjencive të lajmeve, përfshirë “Press Association”, në prag të Forumit Ndërkombëtar Ekonomik në Shën Petërburg ( SPIEF). Në një konferencë me Kancelaren gjermane Angela Merkel javën e kaluar, Putin bëri një deklaratë të ngjashme për Skripal. Ai i uroi atij shëndet të mirë, por tha: “Zoti i dhuroftë atij shëndet të mirë... Nëse do të ishte përdorur një helm i gradës ushtarake, ai do të kishte vdekur në vend. Falë Zotit, ai e mori veten dhe doli nga spitali”.