Qeveria rrit pensionet, shtesa për çdo kategori

Qeveria vendos të rrisë me 2.8 për qind pensionet. Zbardhet vendimi i plotë dhe shtesa për të 18 kategoritë. Pensioni i ri nis nga 1 korriku

Nga data 1 korrik, nuk do të ketë më pensione nën 15528 lekë në muaj. Qeveria miratoi dje indeksimin e të gjitha pensioneve në masën 2.8 për qind.

Rritja është gati e barabartë me atë të një viti më parë, kur pensionet u shtuan para fushatës elektorale me 3 për qind. Gazeta zbardh të plotë vendimin, me shtesat për të 16 kategoritë e pensionistëve në të gjithë vendin. Nga rritja e pensioneve e parashikuar në këtë vendim do të përfitojnë rreth 665 mijë pensionistë, prej të cilëve rreth 490 mijë janë pensione qyteti, rreth 155 mijë janë pensionistë që marrin pensione fshati dhe rreth 20 mijë janë pensione të parakohshme suplementare të ish- ushtarakëve.

SHTESA PËR ÇDO KATEGORI Shtesa e re 2.8 për qind është e barabartë me 364 lek/ muaj më shumë për pensionet e ulëta dhe 729 lekë në muaj më shumë për pensionet e larta. Gjithmonë për ata që kanë dalë në pension para datës 31 dhjetor 2014. Për fshatin, shtesa është më e vogël. 250 lek/ muaj për pensionet e ulëta dhe 364 lekë në muaj për pensionet e larta. Edhe pse duket një rritje e vogël, në total qeveria duhet të shpenzojë 1,545 miliardë lekë ose rreth 15 milionë usd, vetëm për 6- mujorin e dytë të këtij viti. Shtesa për një vit fiskal arrin në 30 milionë usd. Gazeta po boton sot tabelat e plota për çdo kategori pensionistësh bashkë me ndryshimin e pensionit. Nga 1 korriku, çdo pensionist do të marrë pensionin e ri. Lajmin për miratimin e indeksimit të pensioneve dje e dha vetë Rama. “Në këtë mbledhje kemi bërë një hap tjetër shumë të vogël në raport me nevojën, por jo të pandjeshëm për 665 mijë pensionistë, pasi kemi rritur pensionet mbi inflacionin. Nëse do t’i referoheshin shifrave, kemi vendosur 15 milionë dollarë plus në paketën e pensioneve, me 2.8%, duke nisur nga data 1 korrik”, theksoi Rama. Në fakt, indeksimi i pensioneve nuk llogaritet mbi inflacionin e përgjithshëm. Që pas reformës, indeksimi i pensioneve bazohet në rritjen e çmimeve të disa produkteve të tjera nga shporta e popullatës. Ku bazë janë ushqimet dhe ilaçet. Ndryshe nga inflacioni që ka rezultuar në rritje me rreth 2.1 për qind, shporta e pensionistëve është rritur me rreth 2.8 për qind. Ndaj, indeksimi vetëm sa i barazon jetesën një pensionisti. Ai do jetojë edhe në 2018- ën njësoj si në 2017- ën, pa asnjë të ardhur më shumë. SA BËHET PËRFITIMI MUJOR Vendimi i saktëson të gjitha rritjet për kategoritë. “Pas datës 1.7.2018, të ardhurat minimale nga pensionet e plota të qytetit me datë filli- mi deri në 31.12.2014, shtuar me kompensimet nuk mund të jenë me të vogla se 15528 lekë në muaj, të ardhurat maksimale arrijnë 27257 lekë në muaj”, thuhet në vendim. Nga ana tjetër, qeveria përcakton se nga 1 korriku, “Të ardhurat minimale nga pensionet e plota të fshatit nuk mund të jenë me të vogla se 10.051 lekë në muaj, ndërsa të ardhurat minimale nga pensionet e parakohshme, shtuar me kompensimet, nuk mund të jenë më të vogla se 15.528 lekë në muaj”. Këto janë parametrat për pensionet e vjetra, pra ato para reformës që i ndau pensionistët në dy kategori, para vitit 2015 dhe pas vitit 2015. Për kategorinë e dytë, pra për pensionistët që do dalin tani në pension, shtesa bazohet te pensioni social. Edhe pensioni social është shtuar me 2.8 për qind. Sipas vendimit, për pensionet e caktuara me datë fillimi nga 01.01.2015 e në vazhdim, e ardhura minimale nuk mund të jetë më e vogël se masa e pensionit social, e cila nga 7064 lekë bëhet 7262 lekë në muaj. E ardhura maksimale varet nga paga dhe zgjatja e periudhës së sigurimit dhe si pasojë nuk ka kufizim në masën e saj.