Basha: Rama, Tahiri e Xhafaj, pengesa për negociatat
Basha: Fasada ka rënë. Qeveria është lakuriq para botës
Kryetari i opozitës, Lulzim Basha, iu referuar deklaratave të zv/ kryetarit të Kancelares gjermane, Angela Merkel, për të sqaruar se mesazhet e Europës po bëhen gjithnjë e më të qarta në lidhje me çeljen e negociatave për Shqipërinë.
Zv/ kryetari i Grupit Parlamentar CDU/ CSU deklaroi dy ditë më parë se Shqipëria nuk ka plotësuar asnjë nga kushtet për çeljen e negociatave, ndërkohë që theksoi se ish- ministri i Brendshëm, Saimir Tahiri, është “peshk i madh”, ndaj edhe çështja e tij është shumë serioze. Sipas Bashës, hapja e negociatave dhe integrimi i Shqipërisë në BE nuk është proces reklamash dhe lobimesh personale, siç është përpjekur ta shesë Kryeministri Rama. “Hapja e negociatave dhe integrimi i Shqipërisë në BE nuk është proces reklamash dhe lobimesh personale. Është një proces i vërtetë i veprimit dhe sjelljes si europiane. Strategjia e Edi Ramës, përmes krijimit të një fasade të rremë që gjërat në Shqipëri shkojnë mire, ka dështuar. Fasada ka rënë. Qeveria është lakuriq para botës. Sot nuk ecin më gënjeshtrat, mashtrimet, kërcënimet dhe fajësimet e të tjerëve. Mesazhet e zv/ kryetarit të Grupit Parlamentar CDU/ CSU se Shqipëria nuk ka plotësuar asnjë kusht për hapjen e negociatave, se Tahiri është ‘ peshk i madh’ dhe Xhafaj duhet të largohet, janë pasqyra e vërtetë e gjendjes në Shqipëri dhe prova se gënjeshtrat nuk ecin”, tha Basha.
NEGOCIATAT Kreu i opozitës shprehu dakordësitë me zv/ kryetarin e partisë së Merkel, kur deklaroi se Gjykata Kushtetuese duhet të zhbllokohet dhe peshqit e mëdhenj duhet të kapen. “Duhet të zhbllokohet Gjykata Kushtetuese dhe Gjykata e Lartë dhe të krijohet SPAK. Është rritur trafiku i të gjitha drogave. Reforma zgjedhore, kusht i rëndësishëm për hapjen e negociatave. Emërimet në administratë janë në shkelje të ligjit. Peshqit e mëdhenj janë të paprekur, në rrjetë kanë rënë vetëm peshq të vegjël. Tahiri është peshk i madh. Çështja e tij është një pengesë reale për hapjen e negociatave. Fatmir Xhafaj është në konflikt interesi dhe vazhdimi i tij në detyrë bie ndesh me standardet europiane të sundimit të ligjit, rrjedhimisht dhe moslargimi i tij është pengesë për hapjen e negociatave”, u shpreh kreu i PD. Për Bashën, sot zgjidhjet janë të qarta nëse duam të tregojmë se e duam Europën, duke nisur që nga largimi i Xhafajt, burgosja e Tahirit dhe zgjedhje të ndershme për të larguar Ramën. “Rama, Tahiri, Xhafaj, janë sot pengesat kryesore të integrimit në BE. Zgjedhja që kemi sot përpara nesh është e qartë: Nëse duam Europën, Samir Tahiri duhet të jetë aty ku e kanë vendin trafikantët dhe pushtetarët e lidhur me trafikantët. Nëse duam Europën, Fatmir Xhafaj duhet të largohet. Nëse duam Europën, qeveria duhet të luftojë dhe jo të mbrojë korrupsionin, krimin dhe trafikantët. Nëse duam Europën, duhet të bëjmë reformë zgjedhore dhe të ndalim njëherë e përgjithmonë shitblerjen e votës dhe manipulimin e zgjedhjeve”, deklaroi Basha.