Fleckenstein: Shqipërisë t’i çelen negociatat
Raporti që Komiteti i Jashtëm i përcolli Këshillit të Ministrave
Raportuesi për Shqipërinë në Parlamentin Europian, Knut Fleckenstein, i kërkoi Këshillit Europian që të çelë negociatat me Shqipërinë pa kushte. Gjatë fjalës së tij në Parlamentin Europian, eurodeputeti Fleckenstein deklaroi se Shqipëria ka bërë progres të qartë në çështje që kanë të bëjnë me zbatimin e ligjit. “Në Shqipëri ka pasur progres të qartë dhe çështjet sa i takojnë sundimit të ligjit po shkojnë në drejtimin e duhur dhe ndoshta edhe më mirë se në disa vende brenda Bashkimit Europian. Prandaj, ne duhet të hapim bisedimet e anëtarësimit me këtë vend”, tha raportuesi për Shqipërinë në Parlamentin Europian. Qëndrimi i Fleckenstein përpara Parlamentit Europian erdhi menjëherë pas rekomandimeve që Komiteti i Jashtëm i Parlamentit Europian publikoi për Shqipërinë. Në një raport voluminoz me 35 pika, raportuesi për vendin tonë, Knut Fleckenstein, i ka renditur Këshillit të Ministrave të Bashkimit Europian të gjitha reformat e realizuara nga Shqipëria. Sipas Fleckenstein, shumë prej reformave të rëndësishme në Shqipëri duhet të kenë konsensusin e palëve, kryesisht për çështje që kanë të bëjnë me procesin e integrimit të vendit në BE. Eurodeputeti Fleckenstein ka rekomanduar që maxhoranca të jetë më shumë e fokusuar në reformën në drejtësi, duke rekomanduar edhe nevojën e ngritjes sa më shpejt të institucioneve të reja të drejtësisë. “Përshëndet përditësimet e fundit të legjislacionit antikorrupsion të vendit, thekson nevojën për të përfunduar themelimin e Byrosë Kombëtare të Hetimeve, të Tribunalit Special dhe të Prokurorisë Speciale Kundër Korrupsionit dhe Krimit të Organizuar”, thuhet në raportin që Komiteti i Jashtëm i Parlamentit Europian hartoi për Shqipërinë. Duke vlerësuar hapat e ndërmarra në luftën kundër korrupsionit, Flecken- stein bën thirrje për të reduktuar korrupsionin në jetën e qytetarëve. “Bëj thirrje për një vëmendje më të madhe që duhet t’i kushtohet korrupsionit politik dhe publik- privat dhe thekson se një rekord bindës mund të arrihet vetëm nëpërmjet hetimeve proaktive, ndjekjeve penale dhe dënimeve përfundimtare në rastet e korrupsionit në të gjitha nivelet, duke përfshirë rastet e nivelit të lartë”, shkruan në raport Fleckenstein. Komiteti i Jashtëm i Parlamentit Europian ka kërkuar që dialogu konstruktiv politik, gatishmëria për kompromis dhe ruajtja e angazhimit të palëkun- dur në zbatimin dhe konsolidimin e reformave në të gjitha pesë prioritetet kyçe të jenë prioritare për të çuar përpara procesin e pranimit në BE. Në 28 qershor, Shqipëria do të marrë një përgjigje në lidhje me rekomandimin që mori për çeljen e negociatave me Bashkimin Europoian. Disa vende si Gjermania, Franca dhe Holanda kanë shprehur hapur skepticizmin e tyre në lidhje me çeljen e negociatave për Shqipërinë. Përfaqësues të lartë të këtyre vendeve kanë renditur një sërë çështjesh, në të cilat Shqipëria nuk ka përparuar për të nisur negociatat me BE- në.