Shfrytëzimi i fëmijëve, Manastirliu: Burg për prindërit që i nxjerrin në rrugë

Kallëzim penal e deri në burg për prindërit që shfrytëzojnë ekonomikisht fëmijët e tyre duke i nxjerrë në rrugë. Ky penalizim do të jetë pjesë e ligjit “Për procedurat për identifikimin, ndihmën e menjëhershme dhe referimin e fëmijëve të shfrytëzuar ekonomikisht, përfshirë fëmijët në situatë rruge”, që pritet të miratohet së shpejti nga qeveria. Lajmin e dha ministrja e Shëndetësisë, Ogerta Manastirliu, në prani të drejtuesve të programit “Romacted” të Këshillit të Europës dhe Komisionit Europian. “Ministria e Shëndetësisë dhe Mbrojtjes Sociale ka ndërmarrë nismën për identifikimin dhe ndihmën e menjëhershme për fëmijët e shfrytëzuar, për të frenuar punën e fëmijëve. Gjatë vitit 2017, nga Njësitë e Mbrojtjes së Fëmijëve janë menaxhuar 1650 fëmijë në situatë risku, nga të cilët 387 fëmijë u identifikuan të shfrytëzuar ekonomikisht dhe në situatë rruge, ku fëmijët e komunitetit rom janë më të ekspozuarit ndaj këtij fenomeni”, deklaroi ministrja duke treguar me shifra punën e bërë në vite dikasteri që drejton. Grupe pune do të jenë në terren për identifikimin e fëmijëve që shfrytëzohen ekonomikisht. Të miturit do të marrin ndihmën e menjëhershme dhe familjarët do të kenë alternativë punësimi. Zv. drejtoresha e Përgjithshme për Fqinjësinë dhe Negociatat e Zgjerimit në Bashkimin Europian, znj. Katarina Mathernova, tha se Shqipëria ka bërë përpjekje pozitive në fushën e legjislacionit, në përputhje me standardet dhe konventat ndërkombëtare. “Shqipëria është një shembull i shkëlqyer për tregues që lidhen me aksesin në shërbime shëndetësore për komunitetin rom, masat për stre- himin apo shërbime të tjera”. Programi i përbashkët i Këshillit të Europës dhe Bashkimit Europian “Romacted” ka synim kontributin në mirëqeverisjen në nivel lokal në disa bashki kryesore të vendit për përfshirjen e komunitetit rom dhe egjiptian në politikëbërje dhe zbatimin e politikave.