Vrasja e Marvi Mihalit, Gjykata rikthen në burg dy prej të akuzuarve
Gjykata e Tiranës pranon kërkesën e prokurorit të ri, urdhërarrestet pritet të ekzekutohen në ditët në vijim
Gjykata e Tiranës ka vendosur të ndryshojë masat e sigurimit për dy nga katër të akuzuarit për vrasjen e Marvi Mihalit.
Kështu, gjykata ka pranuar kërkesën e Prokurorisë për të vendosur "arrest me burg" për Kridens dhe Marsel Allën, ndërsa Eugen Bitraj do të hetohet nën masën "detyrim paraqitjeje". Kjo lëvizje vjen vetëm pak javë, pasi për tre të sipërpërmendurit Prokuroria e Tiranës ndryshoi edhe akuzat, duke i akuzuar ata për "vrasje në bashkëpunim". Më parë, prokurori Artan Lulaj kishte vendosur të akuzonte Dejvi Bitrajn për vrasjen e Mihalit dhe tre të tjerët i akuzonte për "moskallëzim krimi". Mirëpo, prindërit e viktimës, Pavllo dhe Mira Mihali, ngritën zërin ndaj asaj që e quajtën "vrasje për së dyti" të djalit të tyre. Ata akuzuan prokurorin Artan Lulaj se kishte bërë pazar me familjarët e autorëve. Menjëherë u vu në lëvizje organi i akuzës, duke ndryshuar prokurorin e çështjes dhe më pas ndryshuan edhe akuzat dhe masat e sigurisë. Më 11 maj të këtij viti u liruan nga qelitë e paraburgimit Eugen Bitraj, Kridens Alla dhe Marsel Alla, ndërsa i vetmi që mbeti në burg është Dejvi Bitraj, që ka marrë autorësinë e krimit. Mirëpo, nga pamjet filmike duket qartë se Dejvi Bitraj, pasi e godet me thikë në shpinë Marvi Mihalin, largohet nga vendngjarja më shpejtësi, ndërsa tre të tjerët vazhdojnë ta dhunojnë barbarisht derisa i riu jep shpirt. Për ndryshimet e akuzave, babai i Marvi Mihalit që u vra për një karikues bëri kallëzim penal ndaj prokurorit Lulo dhe dy gjyqtarëve në Prokurorinë e Krimeve të Rënda. Në kallëzimin e dorëzuar më 25 maj në Prokurorinë e Krimeve të Rënda, babai i viktimës, Pavllo Mihali, akuzonte prokurorin Artan Lulaj për korrupsion. Ai madje ka rrëfyer në kallëzim edhe takimin me prokurorin Lulaj, i cili sipas tij, i ka thënë se "nuk pyet njeri" për punën e tij. Kallëzimi është dërguar edhe në Komisionin e Pavarur të Kualifikimit dhe në Prokurorinë e Përgjithshme, Kryeprokurores Arta Marku. "Ky person ( Artan Lulaj), në kundërshtim të hapur me detyrën fisnike që i ka ngarkuar shteti shqiptar, shkel të gjitha të drejtat tona dhe të djalit tonë, Marvi Mihali, duke i lënë të lirë tre nga katër të pandehurit e procesit penal. Ky prokuror, në mënyrë abuzive gjatë 8 muajve të fundit nuk na thërriti qoftë edhe një herë për të komunikuar dhe për të na dëgjuar në lidhje me ngjarjen makabre ku 4 persona në bashkëpunim me njëri- tjetrin, vranë djalin tonë të vetëm, Marvi Mihali. Ky prokuror, në këmbim të shumave të parave, këmbeu gjakun e derdhur të djalit tonë me lirinë e tre kriminelëve, duke i liruar me akuzën e "moskallëzimit të krimit", të parashikuar nga neni 300 i Kodit Penal, edhe pse nuk ishin në asnjë nga kushtet dhe kriteret për ndryshimin e cilësimit juridik të veprës penale. Ne, prindërit e Marvi Mihalit, viktimës së veprës penale, edhe pse i paraqitëm provat e pakundërshtueshme, ai me arrogancë u shpreh se "kam gabuar" dhe ju "shkoni ku të doni, unë nuk pyes njeri". Dhe jo vetëm, ky prokuror, në mënyrë të fshehtë takohej me baballarët e kriminelëve Bitraj dhe avokatin e tyre", shkruante Pavllo Mihali në kallëzimin drejtuar Prokurorisë së Krimeve të Rënda.