Republika e Maqedonisë së Veriut, konfirmohet emri i ri
Hapet rruga për në BE dhe NATO. Referendumi, në vjeshtë
Një kontest shumëvjeçar mes Athinës dhe Shkupit për emrin e republikës maqedonase është zgjidhur më në fund.
Kryeministri grek, Alexis Tsipras, ka shkuar në kabinetin e Presidentit Prokopis Pavlopulos për të informuar për detajet e marrëveshjes së arritur. Tsipras tha se marrëveshja e arritur midis Maqedonisë dhe Greqisë është marrëveshje e mirë dhe se e njëjta përfshin kushtet e palës greke, erga omnes dhe ndryshime kushtetuese. Edhe Kryeministri Zoran Zaev në Shkup deklaroi në një konferencë, se zgjidhja për emrin është dhe ajo është Republika e Maqedonisë së Veriut. Marrëveshja, sipas mediave greke, do të nënshkruhet në Prespë këtë fundjave.
Zaev tha se: "Me këtë marrëveshje do të kemi identitetin, gjuhën dhe kulturën tonë. Nga sot e tutje nuk do të quhemi më FYROM- as, por maqedonas. Nga sot, emri i ri i do të jetë Republika e Maqedonisë së Veriut, nacionaliteti maqedonas i veriut, gjuha maqedonase dhe po ashtu do të përkthehet në të gjitha gjuhët e botës. Më parë do të ratifikohet në Kuvend e më pas do të shkojë për firmë në Presidencë dhe më pas do të ketë dhe aprovimin e popullit me anë të një referendumi. E njëjta do të aprovohet edhe në Kuvendin e Greqinë", tha Zaev. Kryeministri maqedonas e quajti këtë marrëveshje historike, pasi i hap rrugë integrimit të vendit në Bashkimin Europian dhe në NATO. Greqia do të japë pëlqimin që vendi të marrë ftesën për anëtarësim në NATO dhe datë për çeljen e negociatave me Bashkimin Europian, të cilat ishin bllokuar deri tani me veto nga pala greke, pikërisht për mospajtimet ndaj çështjes së emrit.
PIKAT E MARRËVESHJES
Sipas mediave greke, është një dokument rreth 20- faqesh, i cili përmban marrëveshjen më të fundit për emrin mes qeverisë greke dhe asaj maqedonase. Disa nga pikat e marrëveshjes janë si më poshtë:
Gjuha - Maqedonia e Veriut pranon në marrëveshje se kjo gjuhë ka origjinë sllave ( ashtu siç është regjistruar në kornizën e OKB- së)
Shtetësia - Do të jetë me termin maqedonas/ qytetarë të Republikës së Maqedonisë së Veriut, me arsyetimin, shpjegim, të qartë se njerëzit e këtij vendi nuk kanë kurrfarë lidhje me kulturën e Greqisë antike.
Referenca "të mbrohen pakicat maqedonase", hiqet nga Kushtetuta.
Koha - Një periudhë tranzicioni është përcaktuar për ndryshime të dokumenteve të brendshme dhe ky proces do të ndërlidhet me hapjen e negociatave para- aderuese. Po ashtu, do të formohet komision për përdorimin e termeve tregtare në të dyja vendet.