Meta në Bundestagun gjerman: Çelja e negociatave, sinjal pozitiv
Kreu i shtetit takim me Presidentin e Bundestagut, Schauble
Presidenti Ilir Meta ishte dje në një vizitë zyrtare në Gjermani, ku u prit nga presidenti i Bundestagut, Wolfgang Schauble.
Kreu i shtetit në këtë takim me presidentin Schaunle, ka vlerësuar qëndrimin e Bundestagut në favor të hapjes së negociatave. Në njoftimin e Presidencës për këtë takim thuhet se: “Duke iu referuar progresit të bërë në përmbushjen e prioriteteve kyçe, Presidenti Meta theksoi rëndësinë e jashtëzakonshme që do të kishte një vendim pozitiv i Bundestagu gjerman në favor të çeljes së negociatave të anëtarësimit me Shqipërinë dhe Maqedoninë. ‘ Çelja e negociatave vetëm do të na ndihmonte më shumë për të adresuar më mirë të gjitha prioritetet dhe përmbushur standardet dhe kriteret e nevojshme, si dhe do të jepte një sinjal shumë pozitiv për të gjitha forcat në rajon’”. Gjatë takimit u vlerësua premtuese dhe inkurajuese marrëveshja mes qeverisë greke dhe asaj maqedonase për zgjidhjen e çështjes së emrit të Maqedonisë dhe u theksua rëndësia e përfundimit të fazës finale të dialogut Kosovë- Serbi. Të dy bashkëbiseduesit ndanë shqetësimin për çështjet e sigurisë që kërcënojnë rajonin e Ballkanit Perëndimor dhe theksuan nevojën e një bashkëpunimi më të ngushtë në këtë drejtim, si në nivel dypalësh ashtu edhe në atë rajonal e europian. Gjatë takimit, Meta ka shprehur mirënjohjen e thellë për ndihmën dhe mbështetjen e gjithanshme që Gjermania i ka dhënë Shqipërisë dhe shqiptarëve, 30 vite bashkëpunim diplomatik dypalësh.
TAKIMI Presidenti Meta ka qenë i ftuar në Mëngjesin e Lutjeve në Berlin. Kreu i shtetit e ka postuar këtë takim në faqen e tij të “Facebook”. “Privilegj i veçantë të isha i ftuar nderi në takimin e 23- të ndërkombëtar të Berlinit mes kolegësh, miqsh dhe udhëheqës të besimeve të vendeve të ndryshme të botës. Paqja dhe stabiliteti janë të pranishme në rajonin tonë e sot kemi mundësinë historike për ta bërë atë të pakthyeshme. Fryma e bashkëpunimit dhe mirëkuptimit të ndërsjellë në rajonin tonë duhet të forcohet më tej dhe çështja e emrit të Maqedonisë falë progresit historik të ditëve të fundit të finalizohet sa më parë. Dialogu ndërmjet Kosovës dhe Serbisë duhet të përparojë drejt një zgjidhjeje përfundimtare të pranueshme për të dyja vendet në të mirë të tyre dhe të vetë rajonit. Vura në pah progresin e bërë nga Shqipëria në procesin e integrimit europian, duke theksuar se jemi optimistë për një vendim pozitiv dhe të rëndësishëm nga Këshilli Europian për çeljen e negociatave të anëtarësimit të Shqipërisë në Bashkimin Europian, vendim i cili do të ishte një shtysë inkurajuese për Shqipërinë dhe për të gjithë rajonin në adresimin më të vendosur të prioriteteve kyçe dhe të bashkëpunimit rajonal”, shkruan Meta.