Altin Basha: Deputetët të votojnë si qytetarë, kujdes lojërat politike
Regjisori Altin Basha nuk kurseu të majtë e të djathtë. Ai u kujtoi këtyre të fundit projektet e tyre për xhami me kullë, ndërsa u kërkoi të dyja palëve sinqeritet me artistët. Basha ngriti pyetjen se “Si ka mundësi që arti dhe kultura të jenë të fundit në interesat e kësaj qeverie, kur Kryeministri është një artist? Në kushte normale, duhet të ishim komuniteti më i favorizuar, por jemi më i margjinalizuari, sepse ne nuk prodhojmë vota. Nuk merremi parasysh as nga Ministria e Kulturës, sepse ne zërin e kemi për në skenë. Qeveria thotë s’ka para. Është e kuptueshme, sepse ne nuk jemi Gjermania, por kur shoh atë godinën aty të rikonstruktuar, do të thotë që kjo nuk është një arsye e fortë për të shembur TK- në”, tha Basha. Sipas tij, “Nëse qeveria e ka për zemër të ndërtojë një teatër të ri, atëherë të shesë një aset kombëtar. Duhet të ketë mbetur diçka pa shitur”. Ai përmendi projektligjin për kalimin e pronës publike te privati dhe u bëri thirrje deputetëve. “Deputetët e majtë e të djathtë duhet të jenë të ndershëm me ne. Të mos harrojmë kur ky bend qeverisej nga të djathtë, nga një kryetar bashkie i djathtë, që sot është kryetar partie, desh na e bënë jo stadiumin me kullë, por xhaminë me kullë. Të jenë të ndershëm me lojërat politike që bëjnë me artistët dhe qytetarët e Tiranës. I lus deputetët e maxhorancës, edhe pse pak shpresë kam që ata të dalin kundër, ta shohin ligjin si qytetarë, sepse i marrin votat nga qytetarët shqiptarë, le ta bëjnë njëherë precedent dhe të sillen si qytetarë e të votojnë kundër qeverisë e do shohin se çfarë mbështetjeje do të kenë. Këtë teatër ne nuk mund ta bëjmë La Fenice, por duhet ta rikonstruktojmë. Askush nuk duhet ta quajë kapanon, sepse edhe një kapanon merr vlerë nga puna e artistëve që punojnë aty”. Basha tha se, pavarësisht se brezi i tij mund të mos jetë në nivelin e Ndrenikës, Anagnostit apo Kabashit, brezit që vjen më pas nuk i duhet mohuar një teatër me trashëgimi dhe identitet.