Studimet në mësuesi, Nikolla pedagogëve: Riorganizoni programet
Pasi ka marrë shumë mesazhe nga studentë ekselentë që do të zgjedhin mësuesinë preferencë të parë, ministrja e Arsimit ka kthyer vëmendjen nga pedagogët, të cilëve u kërkon të bëjnë më tepër për të plotësuar pritshmëritë e kandidatëve për mësues. Mes diskutimeve të hapura, ministrja theksoi se me portalin “Mësues për Shqipërinë” është ngritur një filtër i parë si kërkesë e kohës që pengon mësuesit jocilësorë të hyjnë në sistem. Por tani, sipas Nikollës, është radha e universiteteve të tejkalojnë veten dhe të tregojnë se janë gati të përballojnë maturantët më të mirë në këto programe. Ajo u kërkoi drejtpërdrejt riorganizimin e programeve të studimit dhe unifikimin e kurrikulave. “Do të kërkoja nga secili prej jush, nga profesorët që jepni mësim në programet e mësuesisë, departamentet po ashtu, një vëmendje të plotë dhe një qartësi me gjithçka që ka ndodhur në arsimin parauniversitar për sa i përket qasjes së re kurrikulare të orientuar nga kompetencat. Ju lutem, shiheni edhe si një prioritet të kohës, duke u ngritur në nivelin e përgjegjshmërisë qytetare që të gjithë kemi, për të adresuar këtë problem, këtë plagë të rëndë në fakt të sistemit arsimor, që lidhet me cilësinë e mësuesve. Ka shumë rëndësi nëse ne këtë vit do të dimë bashkërisht ta adresojmë këtë moment, është një nder i madh që i bëjmë shkollës shqiptare. Diga e parë për të çuar në shkollat e fëmijëve tanë mësues cilësorë në ato diploma që kemi është ngritur, besoj se jeni ju ata që do të bëni të mundur atë që është shumë e rëndësishme, formimin bazë të mësuesve cilësorë në programet tuaja të studimit”, nënvizoi Nikolla. Në fund të takimit, ministrja kërkoi nga Universiteti i Durrësit, por edhe nga institucionet e tjera të arsimit të lartë, të përmbushin rekomandimet dhe objektivat e lëna nga grupi britanik i akreditimit disa muaj më parë.