LISTA ZYRTARE E ATP
Dosjet e 1999- 2000, afati i ri për pronarët
Agjencia e Pronave publikon listën e pronarëve me faturën financiare të kompensimit sipas vendimeve të ‘ 99- 2000. Afatet e reja të ankimimit
Më datë 4 qershor, ATP vendosi të miratojë listat e pronarëve me dosje të viteve 19992000. Bëhet fjalë për 2076 prona, të vlerësuara financiarisht nga Agjencia.
Lista u bë publike nga ATP më datë 9 qershor, në faqen e saj zyrtare. Sipas ligjit, subjektet të cilat disponojnë një vendim përfundimtar, të vlerësuar financiarisht dhe të publikuar, kanë të drejtë dhe mund të paraqiten të aplikojnë për kompensim pranë ATP- së, duke plotësuar dhe paraqitur dokumentacionin e kërkuar. Nga ana tjetër, të gjithë subjektet e interesuar kanë të drejtë të ankohen kundër vlerësimit financiar të kryer nga ATP- ja për përcaktimin e vlerës së pronës në Gjykatën Administrative të Apelit brenda 30 ditëve nga dita e publikimit, vetëm për vlerën e kompensimit. Sot, ky afat ka skaduar. Pra, pronarët duhet të pranojnë vendimin e ATP, për vlerën financiare të publikuar nga ajo. Por, sipas njoftimeve të ATP, të gjithë subjektet, të cilët evidentojnë mangësi në dokumentacion dhe problematika në vlerësim në regjistrin e vendimeve, në bazë të ligjit, mund të plotësojnë dokumentacionin e nevojshëm për vlerësimin financiar të vendimit të kompensimit, brenda një afati prej 6 muajsh nga data e publikimit të regjistrit. “Në rastet kur subjektet e interesuara nuk sjellin dokumentacion të nevojshëm për vlerësimin financiar të vendimit të kompensimit brenda afatit 6- mujor nga data e publikimit të regjistrit, si dhe në rastet kur ATP- ja është në pamundësi objektive për të vlerësuar pronën, bazuar në dokumentacionin që disponon, vendimi i kompensimit vlerësohet financiarisht sipas parashikimeve ligjore”. Gazeta boton sot dy vendimet e ATP, listat e pronarëve përfitues, të ndarë sipas qyteteve dhe faturën financiare të kompensimit për çdo pronë. Në vendimin e parë, “Për publikimin e regjistrit të vendimeve, të cilat kanë njohur të drejtën për kompensim dhe të vlerësimeve për vitin 1999”, janë vlerësuar pronat e 1239 pronarëve. Ndërsa në vendimin e dytë, “Për publikimin e regjistrit të vendimeve, të cilat kanë njohur të drejtën për kompensim dhe të vlerësimeve për vitin 2000”, janë vlerësuar pronat e 837 pronarëve.