Djeg shtëpinë e të shoqit dhe tenton të mbysë vajzat, pranga 42- vjeçares
Arrestohet 42- vjeçarja: Më iku mendja, vendosa të mbysja binjaket e mia dhe më pas veten. Burri pinte e më dhunonte
Pasi shkrumboi banesën e bashkëjetuesit të saj, 42vjeçarja tenton të mbysë në lumin Seman dy vajzat e saj të mitura.
Ngjarja e rëndë ndodhi pasditen e së hënës në fshatin Grecalli të Fierit. Sipas Policisë, Rudina Kishta, 42 vjeçe, fillimisht i ka vënë flakën banesës së Ardian Gjikës dhe më pas është drejtuar drejt lumit Seman bashkë me dy binjaket e saj 6- vjeçare. Fatmirësisht, një djalë i ri, i cili po peshkonte, ka parë tentativën e gruas për të mbytur të bijat dhe ndërhyri në kohë duke shmangur tragjedinë. Ai i ka thënë Policisë se kishte parë një grua që vraponte dhe tërhiqte përdore duke i zvarritur dy fëmijët e saj. Pas kësaj, kur ka mbërritur në bregun e lumit, ajo ua zhyste kokën në ujë. Kjo ka bërë që i riu me iniciale B. N., të vraponte drejt vendit duke ia hequr nga duart e së ëmës të dyja vajzat që ulërinin të tmerruara. "Fati e deshi të shkoja në kohë. Ajo po ua zhyste kokën në ujë. Vajzat ulërinin. Unë shkova dhe i mora fillimisht njërën vajzë dhe e hodha tutje. Pastaj ia hoqa nga duart edhe tjetrën. Vajzat ishin të traumatizuara, por edhe gruaja nuk m'u duk mirë. Ishte shumë e ngarkuar psikologjikisht", është shprehur në Polici i riu që shpëtoi vajzat.
Policia mbërriti në vend dhe arrestoi 42- vjeçaren, e cila, nga hetimi, rezultoi se ishte edhe autore e djegies së banesës. Dyshohet se ajo ka përdorur benzinë. E marrë në pyetje nga blutë, fillimisht gruaja me origjinë nga Elbasani e ka mohuar autorësinë e djegies së shtëpisë. Por, më tej, ndikuar edhe nga gjendja e saj, ajo është dorëzuar duke pranuar gjithçka. Gruaja ka dëshmuar se e kishte kryer këtë veprim pasi i shoqi ( me të cilin nuk kishte martesë ligjore) ia kishte nxirë jetën gjatë të gjithë kohës. Ai, veçse nuk punonte, ishte gjithë kohës i alkoolizuar dhe e dhunonte sistematikisht. Ajo kishte nisur bashkëjetesën dy vite më parë me Ardian Gjikën, pasi ishin futur shkesë të afërm të tyre. Por marrëdhënia nuk po funksiononte mes tyre pasi Ardiani, siç ajo ka pohuar, pinte gjithë kohës dhe ishte i dhunshëm. Për këtë shkak, 6 muaj pasi nisën bashkëjetesën, ajo u largua prej tij për t'u kthyer te familja e saj bashkë me vajzat ( nga një martesë e mëparshme). Edhe Ardiani, siç mësohet, ka dy fëmijë, të cilët jetojnë me ishbashkëshorten e tij. Gruaja ka dëshmuar se gjatë këtyre dy viteve largohej herë pas here nga shtëpia e tij, ( me nga 2- 3 muaj), por me ndërhyrjen e tij te familja e saj, rikthehej. Kështu ndodhi edhe të dielën, kur, sipas saj, Ardiani kishte sh- kuar ta merrte atë, pasi ajo ishte larguar prej tij rreth dy muaj më parë. Duke dashur të besonte premtimet e tij, ajo mori vajzat dhe mbërriti në Fier. Por i shoqi sërish ka nisur të pinte, ndaj ajo e penduar që u rikthye i ka kërkuar që të nesërmen ( ditën e ngjarjes) ta çonte sërish në Elbasan. Ardiani i ka premtuar se do ta çonte pas- dite. Por, ai është vonuar në një lokal të fshatit duke pirë, çka ka sjellë irritimin e gruas deri në ekstrem, duke i djegur atij shtëpinë në shenjë hakmarrje. "Pasi dogja shtëpinë, qëndrova pak në fshat dhe më pas mora vajzat për dore dhe u nisa që të shkoja te familja ime në Elbasan. Por, rrugës, pashë makina policie dhe zjar- rfikëse. U trondita shumë. Mendova do të më arrestonin dhe ku do t'i lija vajzat. Ndaj, për një moment, mendja ime iku... I mora përdore dhe u nisa drejt lumit. Mendova t'i mbysja të dyja e më pas edhe veten. Erdhi një djalë dhe m'i largoi, ai i shpëtoi", është shprehur në Polici 42- vjeçarja, e cila, sipas burimeve, ka qenë mjaft e ngarkuar psikologjikisht gjatë të gjithë kohës së rrëfimit të saj. Sipas banorëve të fshatit, Rudina ishte mjaft e urtë dhe nuk përzihej me njeri. Ata fajësojnë Ardianin për këtë që ndodhi, pasi, sipas tyre, edhe babai i tij, Trifon Gjika, është larguar 1 vit më parë nga banesa për shkak të dhunës së të birit ndaj tij.