Komisioneri Publik apelon vendimin për Alma Bratin: Hetimi pasuror, i mangët
Ankimimi i Komisionerit Publik: Nuk u administruan provat për huan 25 mijë euro dhe regjimin ushqimor 3.2 mln lekë
Komisioneri Publik ka apeluar në Kolegjin e Posaçëm të Apelimit vendimin e Komisionit të Pavarur të Kualifikimit, i cili rikonfirmoi në detyrë gjyqtaren e Gjykatës së Tiranës, Alma Brati.
Kjo e fundit u rikonfirmua në detyrë, edhe pse me notë minimale sa u përket aftësive profesionale, megjithatë, Komisioneri Publik nuk është aspak i bindur për mënyrën sesi është kryer hetimi administrativ për pasurinë e gjyqtares. Kështu, Komisioneri Publik i referohet burimit të krijimit të pasurisë për blerjen e një apartamenti nga ana e gjyqtares. Sipas tij, Komisioni i Pavarur i Kualifikimit nuk ka administruar prova që provojnë ligjshmërinë e një huaje 25 mijë euro, që gjyqtarja ka marrë dhe një shume të dhuruar prej 1.800.000 lekësh. Në të dyja rastet, sipas Komisionerit Publik, Komisioni është mjaftuar me gjendjen e faktit, pasja e llogarive bankare nga ana e personave të lidhur dhe deklaratat noteriale të dorëzuara nga subjekti gjatë hetimit administrativ. Më tej, Komisioneri Publik thotë se dyshues është edhe deklarimi i një shume totale prej 3.160.000 lekë si regjim ushqimor. Sipas Komisionerit Publik, Komisioni nuk ka hetuar burimin dhe ligjshmërinë së këtyre të ardhurave. “Këto të ardhura deklarohen, por nuk ka asnjë dokument provues mbi vërtetësinë dhe ligjshmërinë e tyre, fakt ky i cili ndikon në analizën negative financiare mbi likuiditetet dhe pasuritë e subjektit të rivlerësimit. Subjekti i rivlerësimit prej deklarimit të parë të interesave private e në vijim ka qenë e pasaktë dhe ka kryer deklarim të rremë, reflektuar edhe në deklaratën ‘ Vetting’, në kundërshtim kjo me nenin D të aneksit të Kushtetutës dhe nenin 30 të ligjit nr. 84/ 2016. Komisioni nuk ka hetuar burimin e ligjshëm të huas prej 3.200 euro, marrë prej subjektit të rivlerësimit për mbylljen e kredisë, me qëllim rikonstruksionin e banesës. Komisioni nuk ka hetuar shkakun e mospërputhjes midis sipërfaqes truall të banesës, regjistruar në emër të subjektit dhe bashkëpronarëve të tjerë, me sipërfaqen e tjetërsuar në kontratë”, shkruhet në dokumentin ankimues të Komisionerit Publik.