Berisha: Merkel kundërshtoi argatët e Serbisë në Prishtinë
“Gjermania dha kontribut real kundër krijimit të Serbisë së madhe”
Ish- Kryeministri Sali Berisha ka përshëndetur qëndrimin e mbajtur nga Kancelarja gjermane, Angela Merkel, për rishikimin e territoreve mes Kosovës dhe Serbisë.
Sipas Berishës, qëndrimi i mbajtur nga Merkel është një kontribut real për paqen dhe stabilitetin në rajon. “Kancelarja e Gjermanisë, Angela Merkel, në konferencë shtypi në Berlin me Kryeministrin e Bosnje- Hercegovinës, deklaroi qëndrimin e saj të qartë kundër përpjekjeve për ndryshimin e kufijve në Ballkan. Ky qëndrim i Kancelares është për t’u përshëndetur si një kontribut real për paqen dhe stabilitetin në rajon”, shprehet Berisha. Ish- Kryeministri e cilëson qëndrimin e mbajtur nga Merkel si një përgjigje të merituar për të gjitha përpjekjet e Beogradit për të krijuar Serbinë e madhe, duke kujtu- ar se në këtë pikë janë angazhuar edhe ‘ argatët’ e saj në Kosovë. “Kjo është përgjigjja e merituar ndaj përpjekjeve të Beogradit dhe argatëve të tij në Prishtinë për krijimin e Serbisë së Madhe dhe për copëtimin e ri të Kosovës, ndarjen e saj, zhbërjen e fitores së luftës së shqiptarëve të Kosovës dhe NATO- s kundër Serbisë së Millosheviçit, dhunimit të të gjitha akteve ndërkombëtare për integritetin territorial të Kosovës, dhunimin e rezolutave të Asamblesë së Përgjithshme të OKB dhe Këshillit të Sigurimit dhe dokumentit Ahtisari. Kjo përpjekje është një zhbërje e vendimit të Gjykatës Ndërkombëtare për Kosovën dhe vetë Aktit të Pavarësisë së Kosovës, 116 njohjeve të saj në kufijtë aktualë. Por, me këtë qëndrim, Gjermania, gjithashtu kundërshton hapjen nga serbomëdhenjtë e Beogradit dhe argatët e tyre albanofobë në Prishtinë, të kutisë së Pandorës dhe provokimin e një zinxhiri të ri konfliktesh në Ballkan”, deklaron Berisha.