Vasili: Thaçi, kontradiktor me deklaratat e tij për kufijtë
Deputeti i Partisë Lëvizja Socialiste për Integrim, Petrit Vasili, ka reaguar në lidhje me deklaratat e Presidentit të Kosovës Hashim Thaçi. Në një postim në “Facebook”, Vasili shkruan se deklaratat e Thaçit janë shumë kontradiktore. “Deklaratat e Presidentit të Kosovës për çështjen e kufijve, shkëmbimit të territoreve dhe korrektimit të kufijve janë vërtet mjaft kontradiktore. Vetëm pak muaj më parë, ai deklarohej qartë, në mënyrë parimore, patriotike dhe pa asnjë ekuivok për këto çështje. Këto deklarata na entuziazmuan të gjithëve, pasi i jepnin përgjigjen e merituar çdo pretendimi absurd”, shkruan Vasili. Duke sjellë në vëmendje një deklaratë të disa muajve më parë të Presidentit Thaçi, Vasili tregon se ai është kontradiktor.” Vetëm pak muaj më pas, deklaratat e tij krejt të kundërta e vunë Presidentin kundër vetes. Lexojeni vetë deklaratën e Presidentit Thaçi në 12 shkurt 2018: “Kosova ka integritetin e vet territorial të paprekshëm, është unik, i njohur dhe pranuar ndërkombëtarisht. Janë shqetësuese debatet në prag të dhjetorit të pavarësisë, për gjëra të kota të tejkaluara, për mua të vdekura. Sepse ka pasur më herët ide për ndarje, për shkëmbime, madje ka pasur dhe prej liderëve të Kosovës të deklaruara publikisht për shkëmbim. Mirëpo, unë gjithmonë kam qenë i qartë. Respektimi i integritetit territorial është krucial për të ardhmen e Kosovës. Ide të tilla nuk i sjellin të mirë as vendit, as paqes e stabilitetit në rajon. Idetë e tilla nuk janë të institucioneve të Kosovës”, tha Thaçi.