Rrugë e re në zonën e ish- Kombinatit, Veliaj: Çdo ditë, një punë konkrete
Një tjetër rrugë në kryeqytet është rikonstruktuar nga Bashkia e Tiranës. Përfituesit e radhës janë mijëra familje, që jetojnë në zonën e ish- Kombinatit “Josif Pashko” e deri tek ish- Uzina Dinamo. Gjatë inspektimit të fundit të punimeve, kryetari i bashkisë, Erion Veliaj, vuri në dukje se ashtu siç ishte premtuar, investimet po shkojnë në çdo lagje. Por një lajm akoma më i mirë është projekti i radhës, stacioni i ri i trenit në kryeqytet. “Në Bashkinë e Tiranës kemi një parim: çdo ditë, një punë konkrete! Puna konkrete në këtë ditë të nxehtë gushti është ky ‘ by- pass’, që lidh disa zona informale, që njihen me emrin ‘ shinat e Trenit’. Siç e shihni, shinat e trenit janë këtu dhe presin investimin e radhës të qeverisë, që do sjellë trenin te Bulevardi i Ri, por ndërkohë që presim trenin, s’duhet të humbasim trenin e investimeve në Tiranë. Kjo është arsyeja pse jemi zhvendosur drejt periferisë”, deklaroi Veliaj. Ashtu si edhe për dhjetëra punë të tjera të nisura gjatë periudhës së verës, kryebashkiaku shprehu bindjen se në shtator, kur dhe të nisë vrullshëm viti i ri shkollor, banorët do të gjejnë shumicën e punëve të përfunduar. Investimi i përfunduar në zonën e ish- Kombinatit ishte një projekt i premtuar që në vitin 2013 nga administrata e kaluar, por përfundoi falë ndërhyrjes nga Bashkia e Tiranës për lirimin e hapësirave nga objektet informale dhe trajtimin me bonus strehimi të familjarëve, të cilët prekeshin nga zbatimi i projektit. Ndërhyrja në segmen- tin midis kryqëzimit ish- Kombinati “Josif Pashko” tek ish “Uzina Dinamo” ka konsistuar në realizimin e rrjetit të ri të ujësjellës- kanalizimeve, vendosjen e sistemit të ndriçimit, trotuare, gjelbërim dhe vendosjen e plotë të sinjalistikës horizontale dhe vertikale.