Burri: Më kërkoi ta çoja te familja e saj një ditë pasi erdhi
Ardian Gjika hodhi dyshimin që në momentet e para pas ngjarjes se kishte qenë Rudina, bashkëjetuesja e tij, ajo që i kishte vënë zjarrin shtëpisë. Ai thekson se ajo ka tentuar edhe më parë dhe se herë pas here largohej prej tij me muaj të tërë, duke jetuar te familja e saj në Elbasan. Ai kishte shkuar dhe e kishte marrë të dielën. Por 42- vjeçarja ishte penduar dhe i kishte kërkuar ta rikthente te familja. Ai hodhi dyshime se ajo vuan nga depresioni, por nuk dha detaje të tjera në lidhje me marrëdhënien mes tyre.
Ardian, ku ishit ju në momentin që banesa kishte marrë flakë?
Isha në Daullas, këtu ngjitur me fshatin tonë. U ula në një lokal me një shok. Rudina më kishte kërkuar ta çoja në Elbasan dhe unë ia kisha nxjerrë rrobat jashtë asaj. Por ajo i kishte vënë flakën shtëpisë. Unë e pashë teksa po ikte, por nuk e cdija çfarë kishte ndodhur. Madje, i thashë ik në shtëpi se e kam lënë hapur. Më pas më morën në telefon dhe më thanë ik se po të digjet shtëpia. E mora për shaka, por më pas u nisa dhe ç'të shoh, shtëpia ishte djegur e gjitha.
Pse ia ka vënë flakën shtëpisë, keni ndonjë ide?
Do ketë qenë me depresion, kushedi... Se më tha mua dua të iki te nëna. Mbrëmë erdhi ( e diel), pruri gjithë atë plaçkë, një kamion. I thashë do të çoj në darkë, mbaro punët e do të çoj në darkë. Por ajo s'më priti, i ka vënë flakën shtëpisë.
Dje e morët nga banesa e saj?
Dje, sa e mora. Kishte dy fëmijë të vegjël, binjake, 6 vjeçe.
Ku ishin fëmijët?
Me të ishin, rrugës. Nuk e di. Pse dyshoni se ka qenë gruaja ajo që ia ka vënë flakën? Donte të ikte te mamaja. I thashë mos u mërzit, në darkë mbaroj punë, marr makinën e të çoj.
A ka tentuar edhe herë të tjera?
Po, edhe më parë. E kisha ca muaj këtu, pastaj iku. Kështu vinte e ikte ajo.
Çfarë ju është dëmtuar në banesë?
Çdo gjë që kisha, i gjithë malli. Me mobilie e me të gjitha çfarë ka shtëpia.