Konfliktet e vazhdueshme për pronat, vëllai plagos vëllanë

TIRANE – Një konflikt i vazhdueshëm pronësie mes dy vëllezërve, për pak sa nuk shkaktoi një vrasje dje në Tiranë. Në debat e sipër, për të njëjtën çështje që ziheshin përherë, ka bërë që dy vëllezër të përlesheshin me njëri- tjetrin në shkallët e pallatit. Ngjarja ka ndodhur në rrugën “Meme Meto”, pranë ish- restorant “Durrësit”, ku dy vëllezërit kishin edhe një lokal. Njëri prej tyre, shtetasi I. Xixa, ka goditur me thikë vëllain tjetër 43- vjeçarin A. Xixa. Dëshmitarët nga vendi i ngjarjes thanë dje se i plagosuri ka mundur të largohet me vrap pas goditjes së parë, pasi i vëllai ka tentuar ta qëllonte edhe disa herë të tjera. Menjëherë, banorët kanë lajmëruar Policinë dhe në vendin e ngjarjes kanë shkuar shërbimet e Komisariatit Nr. 4, që kanë bërë të mundur arrestimin e autorit të ngjarjes. Ndërsa i plagosuri mësohet se ka një plagë të rëndë në bark, pasi thika i ka dëmtuar zorrët, megjithatë ndodhet në gjendje të stabilizuar dhe jashtë rrezikut për jetën. “Më datë 14.08.2018, rreth orës 11: 54, në rrugën ‘ Meme Meto’, janë konfliktuar për motive të dobëta dy vëllezër, shtetasit I. X., dhe A. X., ku gjatë konfliktit shtetasi I. X. ka qëlluar në trup me mjet prerës, vëllain e tij, shtetasin A. X. I dëmtuari A. X. është transportuar në spital për ndihmë mjekësore dhe ndodhet jashtë rrezikut për jetën. Shërbimet e Policisë kanë kapur dhe shoqëruar në Komisariatin e Policisë Nr. 4, për veprime të mëtejshme autorin I. X., si dhe kanë sekuestruar në cilësinë e provës materiale mjetin prerës”, tha dje Policia e Tiranës. Ndërsa dëshmitarët thanë se i kishin dëgjuar edhe më parë dy vëllezërit që debatonin me njëri- tjetrin, pasi kishin mosmarrëveshje për sa i përket ndarjes së pasurisë. Megjithatë, më parë ata nuk kishin pasur përplasje kaq të rënda.