Rinovon Spaleti: Inter, nuk trembemi nga askush
"Vazhdojmë ëndrrën tonë, nuk kisha kurrë dyshime për këtë"
Luçiano Spaleti dhe Interi vazhdojnë rrugëtimin së bashku.
Tani është zyrtare: Trajneri ka rinovuar kontratën me skuadrën zikaltër deri në vitin 2021, kontratë e cila skadonte në fund të këtij sezoni. Dy vite të tjera për të synuar rikthimin e Interit në majat e futbollit italian dhe për të rikthyer lavdinë europiane. Spaleti nuk kishte kurrë dyshime për vazhdimin e "martesës" me Interin, por duket se merkato e bërë deri tani e ka kënaqur për të hedhur zyrtarisht firmën në kontratë. Ai shfaqet në fotot e publikuara nga klubi zikaltër përkrah Stiven Zhang, djali i pronarit Jindong Zhang. "Nuk kam pasur kurrë dyshime, vazhdojmë së bashku pa frikë", ishin fjalët e numrit një të zikaltërve.
PAKTI I DËSHIRAVE
Firma e shumëpritur ka ardhur dhe ky ishte një sinjal shumë i rëndësishëm përpara fillimit të sezonit. Një veprim që qetëson ambientin zikaltër. Pas rikthimit në Ligën e Kampioneve dhe një merkatoje të shkëlqyer, në pritjen për të kuptuar nëse do të vijë Modriç, Spaleti "përqafon" akoma më fort projektin zikaltër. Dhe në fjalët e tij kuptohet se nuk ka menduar kurrë të kundërtën. "Dua të falënderoj familjen Zhang dhe drejtuesit e skuadrës që më kanë dhënë mundësinë për të vazhduar këtë aventurë. Dua të theksoj se kjo është thjesht një burokraci që duhet bërë, sepse unë nuk e kam vënë kurrë në dyshim të ardhmen time. Dëshira për të vazhduar dhe për të luftuar të gjithë së bashku për të mirën e këtij klubi ka qenë gjithmonë prezente. Unë kam pasur një raport të shkëlqyer dhe respekt reciprok me drejtuesit dhe takimet e përditshme na kanë bërë të vetëdijshëm për të ëndërruar të njëjtat gjëra për këtë fanellë, për të ëndërruar bashkë me tifozët tanë. Le të themi se tani është bërë zyrtarisht pakti i dëshirave të përbashkëta në botën interviste", ka thënë trajneri i zikaltërve. Falë kualifikimit të Interit pas 6 vitesh në Ligën e Kampioneve, trajneri i bëri për vete drejtuesit, por mbi të gjitha tifozët e kësaj skuadre. Gjithmonë i drejtpërdrejtë për të përballuar sfidat dhe vështirësitë që kishte në vitin e kaluar. Tani do ta ketë më të lehtë, por pas firmës në kontratën e re ndoshta ka ardhur koha që bota interiste, siç e quan Spaleti, të mos kënaqet me pak...