Bakajoko bëhet zyrtarisht "djall": Faleminderit Milanit!

Të martën u zyrtarizua gjithçka. Tiemue Bakajoko është një futbollist i Milanit. Mesfushori francez mbërriti në Milano me formulën e huazimit me të drejtë blerjeje. Një formulë që bindi Çelsin e Mauricio Sarrit për ta lënë që të largohet pas huazimit të Kovaçicit nga Reali. Të premten do të bëhet prezantimi. Për drejtorin teknik, Leonardo është goditja e tretë e merkatos, pas ardhjes së Kaldarës dhe Higuainit. Ndërsa tifozët kuqezinj festojnë transferimin e gjashtë të kësaj vere, që përveç emrave të sipërpërmendur, i bashkohen edhe ata të Reinës, Striniçit dhe Haliloviçit.

Jeta e re - Pasi u formua te Ren në rolin e regjisorit, Bakajoko nisi të mësojë edhe atë të mesfushorit të qendrës, i favorizuar prej teknikës dhe forcës së jashtëzakonshme fizike. Kthesa në karrierën e 23- vjeçarit ndodhi prej sezonit 2016/ 17 me Monakon, ku ai fitoi Ligën e Parë dhe shkoi deri në gjysmëfinalet e Champions- it. Më me pak fat viti i fundit te Çelsi i Antonio Kontes. Pritshmëritë e para nuk u përmbushën dhe francezi u masakrua nga shtypi anglez. Ulja e Sarrit në stolin e bluve e shtyu Bakajokon të ndërronte ambient. Leonardo e rrëmbeu shansin, duke i dhuruar Gatuzos dhe tifozëve kuqezinj një përforcim të çmuar.

Fjalët e para - Pas vizitave mjekësore dhe testeve fizike erdhi edhe firma. Mesfushori me origjinë nga Bregu i Fildishtë, i cili pas dy ditëve do të mbushë 24 vjeç, vjen në Milano në formë huazimi me të drejtë blerjeje. Shifrat e operacionit: Milani paguan 5 milionë euro për huazimin dhe 35 milionë do të kushtonte transferimi përfundimtar. "Milan, faleminderit që besove tek unë dhe për të gjithë mbështetjen", ishin fjalët e para si kuqezi të mesfushorit. "Jemi gati për të përballuar sezonin e ri", shkruante futbollisti në "Instagram". Lojtari që do të mbajë edhe numrin 14 në "San Siro" postoi edhe një foto të tij me dy drejtuesit e Milanit, Leonardo dhe Maldini, me diçiturën: "Faleminderit legjenda!".