KOMPENSIMI FIZIK
Shitja e 1735 objekteve, si përfitojnë ish- pronarët
Gazeta boton listën e dytë zyrtare të Qeverisë me 1735 objektet që do privatizohen në gjithë vendin. Çfarë dhe si përfitojnë ish- pronarët
Nga shitja e 1735 objekteve shtetërore që qeveria ka nxjerrë në ankand, do të përfitojnë edhe ishpronarët. Gazeta vijon sot botimin e listës zyrtare të 1735 objekteve në 12 qarqet e vendit, që qeveria ka nxjerrë në ankand.
Nga këto, 560 objekte janë në proces privatizimi, ku kërkesat për shitje janë kryer ndër vite nga qytetarët. Por, si do të përfitojnë ish- pronarët nga shitja e objekteve shtetërore. Më herët, qeveria miratoi edhe një vendim, që parashikon që për pronat, të cilat do të nxirren në shitje dhe nuk do të ketë blerë, s të kalojnë për kompensimin fizik të ish- pronarëve. Vendimi i miratuar në vitin 2014 përcakton se për rastet kur shitja nuk realizohet, si objekti, ashtu edhe trualli, i kalojnë Agjencisë së Kthimit dhe Kompensimit të Pronave për t’u përdorur si fond i kompensimit fizik të ish- pronarëve. Pra, në këtë rast, si objekti, edhe trualli, do të përdoren për fondin e kompensimit fizik të ish- pronarëve. “Për objektet ndërtimore, të cilat kanë kaluar të gjitha fazat e shitjes dhe nuk janë shitur, dokumentacioni i vlerësimit të objektit kthehet nga Ministria e Financave dhe Ekonomisë, pas 8 muajve nga zhvillimi i fazës së fundit të shitjes. Në rast se gjatë kësaj periudhe ka kërkesa me shkrim për blerje të objektit, atëherë përsëritet procedura e fazës së fundit të shitjes. Ministria e Financave dhe Ekonomisë e dërgon dokumentacionin e kthyer në Agjencinë e Kthimit dhe Kompensimit të Pronave për t’u përdorur si fond i kompensimit fizik. Në rast se për objektin dokumentacioni i të cilit është kthyer për t’u përdorur si fond kompensimi fizik, ka kërkesa me shkrim nga ish- pronarët e truallit, ministria përgjegjëse për Ekonominë i kërkon Agjencisë së Kthimit dhe Kompensimit të Pronave kthimin e dokumentacionit të vlerësimit, pasi kjo e fundit të ketë bërë verifikimin e vlefshmërisë së vendimit që njeh pronësinë”, përcaktohet në vendimin e qeverisë. Referuar vendimit të qeverisë, 100 për qind të të ardhurave të vlerës të truallit të shitur i shkojnë buxhetit të shtetit, përveç rasteve kur është identifikuar ish- pronari i truallit. Po ashtu, për rastet kur ishpronari i truallit, mbi të cilën është ngritur objekti shtetëror nuk ka ushtruar të drejtën e parablerjes së objektit, duke mos paraqitur dokumentacionin ligjor konform vendimit nr. 926 të vitit 2014, në rast se objekti shitet bashkë me truallin, ai përfiton drejtpërdrejt vlerën e truallit, e përcaktuar sipas hartës së vlerës.