Oferta për bashkëpunim në shtator, PD e refuzon: Lojë e Ramës
“Aksioni opozitar vazhdon në shtator deri në largimin e qeverisë”
Opozita nuk do të votojë asnjë ligj të Reformës në Drejtësi, pa u rikthyer reforma në binarët e saj dhe pa u zhbërë të gjitha shkeljet ligjore, që maxhoranca ka bërë në këto dy vite.
Përballë ftesës së hapur të shumicës parlamentare për të kaluar ligjin e magjistraturës në Kuvend, i cili kërkon shumicë të cilësuar prej 84 votash, PDja do të vijojë betejën e saj politike dhe duke denoncuar drejtësinë e kapur, sipas tyre, nga Kryeministri Rama. Në një prononcim për “News 24”, nënkryetari i PD- së, Edi Paloka, e cilëson lojë të Edi Ramës ftesat për tryeza politike, pasi sipas tij, është e thënë edhe nga përfaqësuesit ndërkombëtarë që Reforma në Drejtësi ka dështuar. “Ligji i Magjistraturës është ligj që lidhet me Reformën në Drejtësi. Reforma në Drejtësi është thënë tashmë, jo vetëm nga ne, por edhe nga vëzhguesit realistë të kësaj të ashtuquajture Reformë në Drejtësi, ka dështuar. Sot vetingu nuk është ai që na u tha dhe që prisnin shqiptarët. Sot kalon Dvorani dhe nuk kalon një tjetër. Ne nuk marrim përsipër të mbrojmë asnjë gjyqtar dhe asnjë prokuror të larguar prej KPK- së, por shohim që fatkeqësisht me të njëjta të dhëna, madje edhe me keq se aq, gjyqtarë që janë edhe më të korruptuar, të cilët rezultojnë me fakte më të korruptuar edhe të implikuar në dhënien e vendimeve të padrejta, kanë kaluar. Pse? Sepse kështu ka dashur Edi Rama. Pra, kjo Reformë në Drejtësi, jo vetëm për mua, tashmë është dështim, për të cilin ne e kemi dhënë zgjidhjen, kemi dhënë pikat si mund të rikthehemi në rrugën e drejtë, por duket hapur se Rama nuk e do. Pastaj, ftesat për bashkëpunime dhe të tjera, janë lojëra të zakonshme të Ramës, që dihet se ku të çojnë. Për çfarë duhet tryeza? Ne i kemi renditur pikat si mund të rikthehet Reforma në Drejtësi në binarët e saj kushtetues. Sepse kjo është kryesorja, u shkelën ato ndryshime kushtetuese që u bënë me konsensus me ligje antikushtetuese, që u bënë nga maxhoranca. Nëse nuk kthehemi aty, çfarë kuptimi ka”, shprehet Paloka.
AKSIONI Nënkryetari i PD- së thekson se reagimi opozitar, nga shtatori do të jetë më agresiv deri në largimin e qeverisë. Paloka kujton se në të gjitha sondazhet e realizuara, sh- qiptarët shfaqen të pakënaqur me këtë qeverisje. “Jo gjithnjë politika është në kulmin e aktivitetit dhe jo vetëm politika, por aksioni opozitar do të vazhdojë në shtator dhe gjatë gjithë kohës, deri sa të arrijmë qëllimin që në kemi venë prej kohës, i cili është largimi i qeverisë. Situata vetëm është përkeqësuar, si ajo sociale ashtu edhe ekonomike. Të gjitha sondazhet, të gjitha ngjarjet dhe faktet që flasin si për ekonominë dhe jetën sociale, janë negative dhe kjo do reflektohet në reagimin e opozitës”, thekson Paloka.