Premtimi i Ramës për opozitën: Ofrojmë gjithçka, përveç pushtetit

Kryeministri Edi Rama deklaroi në fund të muajit korrik se po përgatiste një platformë bashkëpunimi, e cila do t’i paraqitet opozitës në fillim të muajit shtator. Kryeministri deklaroi se PD- së dhe LSI- së nuk mund t’u japë pushtetin, por është i gatshëm të ulet me këto dy forca për të diskutuar zgjidhjen e ngërçeve. Rama ka lënë të kuptohet se propozimet e Bashës për zhbërjen e ligjeve të Reformës në Drejtësi nuk janë një mundësi. “Ne, e vetmja gjë që nuk mund t’u ofrojmë Partisë Demokratike dhe simotrës së saj LSI- së, është pushteti. Të tjerat janë të gjitha për diskutim. Nuk kemi asnjë problem. Jemi duke përgatitur një platformë bashkëpunimi, që do ta bëjmë publike me fillimin e sezonit të ri parlamentar dhe jemi të gatshëm për çdo propozim të opozitës që nuk na kthen mbrapa, rikthim mbrapa te Reforma në Drejtësi, rikthim mbrapa te ligjet e Reformës në Drejtësi, rikthim mbrapa te ligji vetingut nuk ka për të pasur për sa kohë që do të jemi në krye të këtij vendi”, ka thënë Kryeministri. Ai ka folur dhe për çështjen e Teatrit, për të cilin tha se nuk do të ketë asnjë kthim mbrapa. “Ky është një diskutim që unë e kam zhvilluar para 20 vjetësh dhe ka 20 vjet që ka mbetur pezull. Këtu nuk ka asgjë të re për të zbuluar”, ka thënë kreu i qeverisë. Partia Socialiste, në seancat e fundit të këtij sesioni parlamentar ka përsëritur në mënyrë konstante ftesën e saj drejtuar opozitës, për të kaluar në Kuvend ligjin për Magjistraturën. Kërkesën për dialog e ka artikuluar disa herë kreu i Grupit Parlamentar të PSsë, Taulant Balla, por edhe Kryeministri Rama. Menjëherë pas vizitës së komisionerit Hahn në Tiranë, i cili bëri thirrje që maxhoranca dhe opozita të bashkëpunojnë sa u takon ligjeve të Reformës në Drejtësi, maxhoranca në pamundësi për të bërë e vetme 84 vota, kërkoi mbështetjen e opozitës.