Paralajmërimi i deputetes së PD: Në diskutim djegia e mandateve
Opozita, në diskutimin e aksionit të saj, po diskuton edhe djegien e mandateve parlamentare. Në kohën kur Basha ka përcaktuar një afat prej 10 ditësh për hartimin e një platforme politike, deputetja e PD- së, Dhurata Çupi, ka theksuar se po diskutohet edhe djegia e mandateve. "Të gjitha opsionet janë të mundshme. Ajo që ne sot duhet të diskutojmë është çfarë i sjell mirë qytetarit. I sjell mirë qytetarit një grup parlamentar opozitar që do të qëndrojë pranë qytetarëve, denoncon çdo aferë të kësaj maxhorance, apo një grup parlamentar që mos të jetë dhe të jetë inekzistent. Pra, djegia e mandateve mbetet opsion. Po diskutohen të gjitha opsionet, ka një grup pune me kryetarët e partive opozitare dhe më gjerë, me teknicienë dhe politikanë me eksperiencë. Ky grup do të vendosë një plan të punës të të gjitha grupeve parlamentare të opozitës. Do të jetë i detajuar, do bëhet publike dhe do diskutohet në detaje me çdo qytetar si do të dilet nga kjo gjendje kritike", deklaroi deputetja e PD në një intervistë për "Ora News". Krahas kësaj vendimmarrje, opozita do të nisë edhe organizimin e protestave, të cilat do të kenë për qëllim ndërgjegjësimin e qytetarëve për gjendjen e rëndë që po kalon vendi. "Do kemi aksion politik, do ketë protesta, do ketë denoncime, do ketë lëvizje politike. Ne u kemi premtuar qytetarëve dhe do jemi pranë qytetarëve. Me këtë gjendje të maxhorancës, me korrupsionin, me aferën, me përfshirjen në bandat kriminale të qeverisë, PD është e gatshme të futet në zgjedhje dhe të fitojë. Por duhen zgjedhje të lira që të fitojë kjo opozitë. Ne nuk mund të futemi në zgjedhje për të qenë aksesorë", theksoi Çupi. Opozita do vijojë të mbajë një marrëdhënie të kushtëzuar me Parlamentin, ndërkohë që do të zhvillojë seanca paralele me ato në Parlament në të gjitha qytetet ku, sipas demokratëve, bandat dhe qeveria po terrorizojnë qytetarët. Sipas burimeve pranë opozitës, dy qytetet që pritet të zhvillohen mbledhjet e përbashkëta do të jenë Vlora dhe Durrësi. Deputetët e Partisë Demokratike kanë denoncuar disa prej të zgjedhurve të PS- së nga këto dy qytete për lidhje me krimin. Gjithashtu, në ditët e ardhshme opozita pritet të bëjë publike edhe platformën e saj, nga e cila do të pritet edhe një reagim nga qeveria, ku vetë Kryeministri Rama ka premtuar për një pakt të ri bashkëpunimi me opozitën.