DËSHMITARËT VIP QË KËRKOI PD PËR KOMISIONIN “TAHIRI”
Partia Demokratike depozitoi në Parlament listën me 12 emrat e dëshmitarëve “VIP”, të cilët do të thërriteshin nga Komisioni Hetimor për çështjen “Tahiri”. Lista e dëshmitarëve që nuk u miratua asnjëherë gjatë mandatit 6- mujor, fillonte me Kryeministrin Edi Rama, ministrin e Brendshëm, Fatmir Xhafaj, ish- ministrin e Brendshëm, Saimir Tahiri, ish- drejtorin e SHISH, Visho Ajazi Lika, drejtorin e përgjithshëm të Policisë së Shtetit, Ardi Veliu. Po ashtu në Komision do të ftohej për të dëshmuar drejtori në detyrë i Shërbimit Informativ, Helidon Bendo. Lista vijonte me drejtuesin e asaj kohe të Prokurorisë së Krimeve të Rënda, Besim Hajdarmataj, ministren e Drejtësisë, Etilda Gjonaj dhe prokurorët, Arqile Koça dhe Rovena Gashi. Pjesë e kërkesave të PD- së ishte dhe drejtoresha e Marrëdhënieve Juridiksionale me Jashtë pranë Ministrisë së Drejtësisë, Odeta Thëngjilli, si dhe 12 drejtorët e Policisë së Shtetit në të gjitha qarqet e vendit. Demokratët do të kërkonin në Komisionin Hetimor dhe praninë e ish- oficerit, Dritan Zagani dhe 5 drejtorëve të burgjeve në vend.
Dështon komisioni hetimor i ngritur nga opozita për të zbardhur të vërtetën e përfshirjes së ish- ministrit të Brendshëm, Saimir Tahiri, në trafikun e lëndëve narkotike.
Dje ka skaduar zyrtarisht mandati i Komisionit hetimor “Tahiri” dhe hetimet mbetën në pikën zero. Nënkryetari i Parlamentit, Edi Paloka, i ka dërguar një letër kryeparlamentarit Gramoz Ruçi ku i kërkon që të ndëshkojë përgjegjësit e këtij dështimi. Për demokratët, fajtorët e mosfunksionimit të Komisionit hetimor janë, ministri i Punëve të Brendshme, Fatmir Xhafaj dhe drejtori i Përgjithshëm i Policisë së Shtetit, Ardi Veliu. Në letrën e PD- së thuhet se Ministria dhe Policia refuzuan t’i japin informacionin e kërkuar Komisionit Hetimor. “Komisioni kishte një afat të veprimtarisë së tij deri më 5 shtator 2018. E kapur në flagrancë, në veprimtari të paligjshme të lehtësimit dhe mbështetjes së organizatave kriminale në kryerjen e trafikut ndërkombëtar të lëndëve narkotike, Qeveria, dhe konkretisht Ministria e Brendshme dhe Policia e Shtetit, ka pamundësuar veprimtarinë e Komisionit Hetimor gjatë gjithë kësaj periudhe. Edhe pse Komisioni Hetimor, që prej muajit prill 2018, ka kërkuar informacione nga Ministria e Brendshme dhe Policia e Shtetit, ende deri sot, asnjë e dhënë apo dokumentacion i kërkuar nuk i është vënë në dispozicion. Kjo sjellje antikushtetuese e Qeverisë ka penguar vijimin e punës së Komisionit Hetimor”, thuhet në letrën e Palokës.
PROCEDURA Në letrën e PD thuhet më tej se pa mbledhjen e informacioneve nga institucionet e vendit, nuk mund të vijohej puna me miratimin e planit hetimor. Për Edi Palokën ky pengim i punës së Komisionit Hetimor u bë për qëllimin e vetëm të fshehjes së “gjurmëve të lidhjeve të qeverisë me krimin e organizuar”. “Kjo sepse, sipas ligjit, për të vijuar punën me miratimin e Planit Hetimor, që i hap rrugë zhvillimit të mbledhjeve të Komisionit, duhet më parë të mblidhen të gjithë informacionet e kërkuara. Pengimi i Komisionit Hetimor për shkak të mosdërgimit të informacionit nga ana e ministrit të Brendshëm dhe Policisë së Shtetit, shërben për të fshehur gjurmët e lidhjes së Qeverisë me krimin e organizuar dhe për asgjësimin e informacioneve dhe provave që përfshijnë në veprimtari kriminale vëllain e dënuar për trafik droge të ministrit aktual të Brendshëm Fatmir Xhafaj, si dhe vetë eksponentët e lartë të Partisë Socialiste si Saimir Tahiri, Fatmir Xhafaj, Taulant Balla, Jurgis Çyrbja, etj.. Kjo është arsyeja e vërtetë e fshehjes së informacionit nga Qeveria dhe vetë ministri i Brendshëm për Komisionin Hetimor”, thekson në letrën e tij demokrati. Xhafaj dhe Veliu akuzohen nga Partia Demokratike se kanë shpërdoruar detyrën dhe për këtë arsye Parlamenti duhet t’i shkarkojë. “Kontrolli parlamentar është mekanizimi i vetëm sesi opozita mund të përfaqësojë dhe mbrojë interesat e qytetarëve në Kuvend. Për këtë qëllim, kërkojmë nga Kuvendi i Shqipërisë qëndrim të prerë ndaj aktit të pengimit të veprimtarisë së Komisionit Hetimor, duke marrë masat e duhura për të vënë përpara përgjegjësisë politike dhe ligjore ministrin e Brendshëm dhe Drejtorin e Përgjithshëm të Policisë së Shtetit. Pengimi i qëllimshëm i Komisionit Hetimor përbën shpërdorim detyre, që sjell shkarkim nga detyra dhe përgjegjësi penale. Gjithashtu, në përputhje me nenet 7, 77 dhe 78 të Rregullores së Kuvendit, kërkojmë zgjatjen e afatit të veprimtarisë së Komisionit Hetimor për një periudhë 3- mujore”, thuhet në letrën e PD.