FATURA FINANCIARE
Kompensimi, skadon afati për 24 mijë pronarë Skadon afati i ankimimit për vlerësimin financiar të pronave. Vorpsi: Fatura 9 herë më e ulët, pse nuk mund t’i drejtohemi Gjykatës
Për pronarët, e drejta e ankimimit në Gjykatë është një mundësi e djegur. Në kushtet kur ka përfunduar vlerësimi për 24 mijë vendime, familjet që s’janë dakord me vlerën e kompensimit, nuk do të kenë rrugë tjetër, përveçse ta pranojnë ato.
Sot skadon edhe afati për vendimet 2013- 2014, të vlerësuara një muaj më parë nga Agjencia e Trajtimit të Pronave. Ligji i ri ka përcaktuar një afat 30- ditor për ankimimet, ndaj edhe ata që s’e kanë bërë një gjë të tillë nuk do të kenë më mundësi që t’u drejtohen gjykatave, përfshirë këtu edhe Gjykatën e Strasburgut. Sipas sekretarit të përgjithshëm të shoqatës “Pronësi me Drejtësi”, Myrshit Vorpsi, gjendemi përballë një titulli ekzekutiv me zero mundësi për korrigjim. “Qeverisë shqiptare nuk i duhet më Ligji 133, pasi ky ligj i ka prodhuar efektet e tij, duke qenë se 24 mijë vendimet janë vlerësuar bazuar në zërin kadastral që prona ka pasur në kohën e shpronësimit. Më keq akoma, për shkak të afateve të sanksionuara në këtë ligj, pronarët kanë humbur edhe të drejtën e ankimimit në shkallët e gjyqësorit. Në këto kushte, vendimi i Agjencisë së Pronave është bërë titull ekzekutiv”, shprehet Vorpsi. Përgjatë kësaj kohe, sipas tij, kanë qenë të paktë ata pronarë që i janë drejtuar Gjykatës për të kundërshtuar faturën e publikuar nga ATP.
FATURA Ndryshimi i formulës së kompensimit është shoqëruar me efekte financiare. Dëmi rëndon mbi pronarët, të cilët do të përfitojnë në rastin më të mirë më pak në raport me vlerën që ka prona e tyre sot në treg dhe në rastin më të keq do ta mbyllin këtë histori duarbosh. “Rreth 629 milionë euro është detyrimi i shtetit shqiptar për 24 mijë dosje që janë aktualisht në shqyrtim në Agjencinë e Trajtimit të Pronave. Kjo vlerë është 9 herë më e ulët se detyrimi real ndaj pronarëve. Të penalizuar janë ata pronarë që kanë më shumë se një vend, pasi vlerat e tyre do të mblidhen dhe, bazuar në vendimin e qeverisë, pronarët do të mund të përfitojnë 20 për qind të vlerës, por jo më shumë se 100 milionë”, shton Vorpsi.
ANKESAT NË KUSHTETUESE Ngërçi i Kushtetueses është një tjetër problem. Për aq kohë sa kjo Gjykatë do të jetë e shpërbërë, edhe ankesat e pronarëve do të mbeten sirtarëve pa mundur të marrin zgjidhje. Prej më shumë se tre muajsh, Kushtetuesja ka ndërprerë veprimtarinë për shkak se në trupën gjykuese kanë mbetur vetëm 2 anëtarë, nga 9 që parashikon ligji. Në këto kushte, vendimmarrja për paditë e depozituara është pezulluar. Sekretari i shoqatës “Pronësi me Drejtësi” thotë se ky ngërç i krijuar është në dëm të pronarëve. “Aktualisht, ne jemi në pritje të formimit të trupës së Gjykatës Kushtetuese. Vonesa është në dëm të pronarëve, pasi është efekti i skemës që përcakton ligji i ri, që sot po arrijnë të publikohen vendime në vlerë negative. Pronarët jo vetëm që nuk do të kompensohen për pronën e tyre, por rezultojnë edhe që të kenë përfituar më tepër nga çfarë iu takon. Kjo, për shkak të formulës që është vendosur me miratimin e ligjit të ri”. Sipas Vorpsit, janë ankimuar në Kushtetuese dy nene, në të cilat përcaktohet se skema e vlerësimit të trojeve është bazuar në zërin kadastral që prona ka pasur në momentin e shpronësimit. Po ashtu, shoqata nuk është pajtuar edhe me hartën me çmimet e pronave si edhe dy vendimet e qeverisë, në të cilat përcaktohen mënyrat e kompensimit. “Kemi ankimuar dy nenet e ligjit të ri, përkatësisht nenin 61b dhe 71b, për të cilat Gjykata Kushtetuese refuzoi të marrë një vendim, duke qenë se nuk kishte kuorumin e nevojshëm. Me ndryshimet që iu bënë ligjit të Gjykatës Kushtetuese, kjo e fundit duhet të shprehet dhe jo të refuzojë. Ne shfrytëzuam pikërisht këtë gjë për të depozituar një padi të dytë për shfuqizimin e këtyre dy neneve. Njëkohësisht kemi kërkuar shfuqizimin e dy vendimeve të qeverisë, përkatësisht 222 dhe 223, të cilat janë në kundërshtim me vendimin e Kushtetueses, pasi lënë në fuqi skemën e re si dhe rrëzimin e hartës me vlerat e trojeve, duke qenë se çmimet e përcaktuara aty nuk reflektojnë çmimet reale që janë sot në treg. Përveç tyre, Kushtetueses i jemi drejtuar edhe për dy vendimet e miratuara nga Qeveria në fund të vitit që shkoi, të cilat janë në vazhdën e vendimeve të mëparshme, për të cilat ne nuk jemi dakordësuar”, bën me dije Vorpsi.