Tatimet: Kujdes me deklarimet, do t’ju fusim me TVSH

Bizneset pa TVSH do penalizohen për gabimet në shtypjen e kasës

Bizneset me xhiro nën 2 milionë lekë në vit, nëse nuk raportojnë te Tatimet shtypjet gabim të kasës fiskale, rrezikojnë të regjistrohen me TVSH. Administrata Tatimore njoftoi dje se është konstatuar se shumë biznese me xhiro nën 2 milionë lekë raportojnë vlera të tjera të xhiros, për shkak të shtypjeve gabim të kasës fiskale. Drejtoria e Përgjithshme e Tatimeve thotë se këto biznese rrezikojnë të regjistrohen si subjekte të vogla me TVSH. “Drejtoria e Përgjithshme e Tatimeve tërheq vëmendjen e të gjithë tatimpaguesve të biznesit të vogël pa TVSH, me qarkullim vjetor nën 2 milionë lekë, që të tregojnë kujdes në lidhje me raportimin e shtypjeve gabim të pajisjeve fiskale që kanë në përdorim. Drejtoria e Riskut në Drejtorinë e Përgjithshme të Tatimeve, nga verifikimi i të dhënave të xhirove të raportuara nga pajisjet fiskale, ka konstatuar se shumë subjekte të biznesit të vogël pa TVSH, raportojnë vlera jashtë normalitetit të aktivitetit të tyre, kryesisht si pasojë e shtypjeve gabim të pajisjeve fiskale. Administrata Tatimore bën me dije se është detyrim i tatimpaguesve që të reklamojnë të gjitha shtypjet gabim të pajisjeve fiskale pranë Drejtorive Rajonale Tatimore, ku subjekti ushtron aktivitetin, sipas procesverbalit përkatës. Çdo mosraportim i shtypjes së gabuar të pajisjes fiskale nga tatimpaguesit, sjell ndryshim nga ana e Administratës Tatimore, bazuar në të dhënat që disponon, të përgjegjësisë tatimore nga ajo ekzistuese në përgjegjësi tatimore ‘ Biznes i vogël me TVSH’”, thuhet në njoftimin e Administratës Tatimore. Nga 1 prilli, bizneset e vogla që kanë xhiro vjetore mbi 2 milionë lekë, janë përfshirë në skemën e TVSH- së. Jashtë skemës së TVSH- së kanë mbetur bizneset e vogla me xhiro nën 2 milionë lekë.